Мәскеу. 4 қараша. ИНТЕРФАКС – Ресей Қауіпсіздік кеңесі хатшысының орынбасары Александр Венедиктовтің айтуынша, Еуропалық одақ әскери-саяси блокқа айналып барады. Ол Францияның ЕО мен НАТО-ға мүше бірқатар елді ядролық қаруымен қорғау жоспары Ресейді алаңдатып отырғанын мәлімдеді.
«Еуроодақ ымыраға келмейтін агрессияшыл әскери-саяси блокқа айналып барады. Бұл үдеріс қарқынды жүріп жатыр», – деді Венедиктов сәрсенбі күні Минскіде өткен Еуразия қауіпсіздігі жөніндегі халықаралық конференцияда.
«Еуропада ресми тұлғалар алдағы бірнеше жылда Ресеймен тікелей қарулы қақтығысқа дайындалып жатқанын ашық айтып жүр. Осындай мәлімдемелермен қатар әскери-өнеркәсіп кешеніне орасан зор қаржы құйылып жатыр. Оның көлемін Екінші дүниежүзілік соғыс кезіндегі шығындармен ғана салыстыруға болады», – деді Венедиктов. Оның сөзін Ресей Қауіпсіздік кеңесінің баспасөз қызметі таратты.
«Париждің Еуроодақ пен НАТО-ға мүше бірқатар елді өз ядролық қаруының қорғанына алу ниеті бізді қатты алаңдатады», – деді Венедиктов.
«Еуропа әлі де ықпалын кеңейтуді көксейді. Ол Украина мен Молдованы ақырына дейін пайдаланбақ, Арменияны өз ықпалына тартуда. Өзге бірқатар мемлекетке де достық пейілге жат қадамдар жасап отыр. НАТО шығысқа қарай кеңеймейміз деген уәдесіне қарамастан, Финляндия мен Швецияны өзіне қосып алып, шығысқа тағы да ілгеріледі», – деді Ресей Қауіпсіздік кеңесі хатшысының орынбасары.
