Гонконг. 13 қазан. ИНТЕРФАКС – Оңтүстік Корея президенті Ли Чжэ Мён сейсенбі күні елдің Солтүстік теңіз жолын жүк тасымалы үшін кеңінен пайдалануға ниетті екенін мәлімдеді. Алайда бұл бағыттағы жұмыстар халықаралық санкцияларды қатаң сақтай отырып жүргізіледі.
«Оңтүстік Корея халықаралық қауымдастықтың сенімін сақтай отырып, Солтүстік Мұзды мұхит арқылы жаңа теңіз жолын игеруге кіріседі. Біз санкцияларға қатысты халықаралық нормалар мен қағидаларды толық ұстанамыз. Сонымен қатар негізгі серіктес елдермен тығыз байланыс орнатып, олардың алаңдаушылықтарын ескеріп, жауапты шешімдер қабылдаймыз», – деді Ли Чжэ Мён.
«Рёнхап» агенттігінің хабарлауынша, президент бұл мәлімдемені Солтүстік теңіз жолы арқылы Еуропаға сапар шегіп, елге сәтті оралған PanStar Acro контейнер тасымалдаушы кемесін қарсы алу рәсімінде жасаған.
Бұл – Оңтүстік Кореяның контейнер тасымалдайтын кемелері үшін аталған бағыттағы алғашқы сапар. PanStar Acro қыркүйекте Пусан портынан шығып, Нидерланд пен Польша порттарына аялдағаннан кейін Ұлыбританияға жеткен. Сапар 50 күнге созылып, кеме өткен жексенбіде Пусанға оралды.
Ли Чжэ Мённың айтуынша, PanStar Acro кемесінің бұл сапары Оңтүстік Кореяның Солтүстік теңіз жолын игеруіне жол ашты. Президент жаңа бағытты бір ғана мемлекеттің мүддесіне емес, баршаға ортақ экономикалық өркендеуге қызмет ететін көлік дәлізіне айналдыруға күш салатынын жеткізді.
Оның сөзінше, Пусан Солтүстік теңіз жолымен байланысқан ірі көлік торабына айналады. Бұл мүмкіндіктің игілігін тек Пусан порты ғана емес, елдің бүкіл кеме жасау өнеркәсібі, сондай-ақ оған жақын орналасқан Ульсан қаласы мен Оңтүстік Кёнсан провинциясы да көрмек.
Солтүстік теңіз жолы – Еуразияның батыс бөлігі мен Азия-Тынық мұхиты өңірін жалғайтын ең қысқа теңіз бағыты. Оның ұзындығы шамамен 5,6 мың шақырым.
«Рёнхап» агенттігі Арктикадағы мұздықтардың еруі өңір арқылы өтетін жаңа теңіз бағыттарын ашуға мүмкіндік беретінін атап көрсетеді. Бұған қоса, Таяу Шығыстағы қақтығыс халықаралық кеме қатынасына кедергі келтіріп, балама көлік дәліздеріне деген қызығушылықты арттырған.
