Астана. 28 қазан. Интерфакс-Қазақстан – Қазақстан 2029 жылға қарай электр энергетикасы саласында өндіріс көлемін тұтынудан асыратын деңгейге жеткізуді көздейді. Бұл туралы энергетика министрі Ерлан Әккенженов Үкімет отырысында мәлімдеді.
Министрдің айтуынша, 2029 жылға дейін елде жалпы қуаты 6,7 ГВт болатын 68 жоба іске асырылмақ.
«2029 жылы экономика қажеттілігі толық өтеліп, Қазақстанның энергожүйесінде профицитке қол жеткізу жоспарланып отыр. Бұл өз кезегінде елдің экспорттық әлеуетін арттыруға мүмкіндік береді», – деді Әккенженов сейсенбі күні.
Бұған дейін Қазақстанда 2025–2026 жылдардың күз-қыс маусымында электр энергиясын өндіру тапшылығы 0,9 ГВт деңгейінде болуы ықтимал екені хабарланған. Бұл тапшылықты Ресей мен Өзбекстан энергожүйелерінен импорт арқылы жабу жоспарланып отыр.
