Астана. 30 қыркүйек. ИНТЕРФАКС-ҚАЗАҚСТАН – Қазақстан АҚШ президенті Дональд Трамптың Газа секторындағы қақтығысты тоқтатуға бағытталған жан-жақты бейбіт жоспарын қолдайды. Бұл туралы Президенттің баспасөз хатшысының көмекшісі Руслан Желдібай мәлімдеді.
«Қазақстан Газа секторындағы қақтығысты тоқтатуға бағытталған АҚШ Президенті Дональд Трамптың жан-жақты бейбіт жоспарын құптайды. Мемлекет басшысы Қасым-Жомарт Тоқаев бұл бастаманы Таяу Шығыстағы жағдайды реттеу, мемлекетаралық сенімді нығайту, сондай-ақ өңірде тұрақты әрі әділ бейбітшілікті орнату жолындағы маңызды қадам әрі бірегей мүмкіндік ретінде қарастыратынын айтты», – деп жазды Желдібай сейсенбі күні әлеуметтік желілерде.
