Астана, 6 ақпан. ИНТЕРФАКС-ҚАЗАҚСТАН – Мемлекет басшысы жұма күні Конституциялық комиссия басшылығымен жұмыс кездесуін өткізді. Кездесуге комиссия төрағасы Эльвира Азимова, оның орынбасары Ерлан Карин және комиссия мүшесі Ержан Жиенбаев қатысты.
Комиссия төрағасы Эльвира Азимованың мәліметінше, eGov және e-Otinish порталдарында бүкілхалықтық талқылауға шығарылған жаңа Конституция жобасына тұрғындар тарапынан 4 мыңнан астам пікір мен ұсыныс түскен.
Президент Қасым-Жомарт Тоқаев Конституциялық комиссия жұмысы ашық форматта жалғасуы тиіс екенін атап өтті. Бұл азаматтардың Конституция жобасын талқылау барысынан хабардар болып, құжаттың мазмұнымен тереңірек танысуына мүмкіндік береді.
Сондай-ақ Мемлекет басшысы сарапшылар қауымдастығы мен қоғам өкілдерінен келіп жатқан барлық ұсынысты бұрынғыдай жан-жақты әрі байыпты түрде зерделеуді тапсырды.
Эльвира Азимова комиссия мүшелері Конституцияның жекелеген баптары мен тармақтарының редакциялары бойынша жұмысты жалғастыратынын жеткізді. Алдағы отырыстар 7 ақпанда және келесі аптада өтеді деп жоспарланып отыр.
Айта кетейік, Конституциялық комиссия Қазақстанның жаңа Конституциясының алғашқы жобасын әзірледі. Құжат кіріспеден, 11 бөлімнен және 95 баптан тұрады. Жоба мәтіні мемлекеттік бұқаралық ақпарат құралдарында және Конституциялық соттың ресми сайтында жарияланып, бүкілхалықтық талқылауға ұсынылды.
