ҚР Қорғаныс министрлігі Каспий теңізінің қазақстандық секторында Әскери-теңіз күштері кемелерінің қатысуымен үш кезеңнен тұратын командалық-штабтық оқу-жаттығу өткенін хабарлайды. Жедел режимді сақтау жөніндегі іс-шараларды орындау мақсатында флот құрамдары мен техникасы жауынгерлік тағайындау аудандарына орналастырылды. Оқу-жаттығу жетекшісі – Әскери-теңіз күштерінің бас қолбасшысы, 1-дәрежелі капитан Қанат Ниязбеков теңіздегі экономикалық қызмет нысандарын қорғау мәселелері мен бөлімшелердің өзара іс-қимылына ерекше назар аударылғанын атап өтті. Жиын барысында теңіз жаяу әскері десанттық-шабуылдау батальоны мен су асты диверсиясына қарсы іс-қимыл бөлімшесінің жеке құрамы лаңкестер басып алған азаматтық кемені босату бойынша оқу-жауынгерлік тапсырмасын орындады. Аталған шара командирлердің басқару дағдыларын жетілдіруге септігін тигізді. Маневрлер кезінде жеке құрам жоғары дайындық деңгейін көрсетіп, алға қойылған міндеттерді орындауға қауқарлы екенін дәлелдеді.
Еуразия24 пікірі:
Қазақстан үшін Каспий – жай ғана су айдыны емес, стратегиялық маңызы бар инфрақұрылымдық аймақ. Мұнай өндіру, көлік дәліздері мен экспорттық ағындар – еліміздің Каспий теңізіндегі мүдделерінің бір бөлігі ғана. Сондықтан құбылмалы геосаясат пен аймақтық қауіпсіздікті қамтамасыз ету қажеттілігін ескерсек, Қарулы Күштердің нысандарды қорғау және кемелерді босату тәсілдерін пысықтауы жай ғана теория болудан қалды. Соңғы жылдары нақты сын-қатерлер деңгейі айтарлықтай өсті. Сонымен қатар, Каспий айдынында әскери тәжірибені шыңдау «еуразияшылдық» тұрғысынан логистика мен энергетиканың тұрақтылығы үшін үлкен маңызға ие. Кез келген диверсия, лаңкестік әрекеттер немесе бағыттардың бұғатталуы бүкіл ЕАЭО-ның транзиттік, экспорттық және энергетикалық тізбегіне тікелей соққы болып тиеді. Ал Таяу Шығыстағы ахуал кез келген жағдайға дайын болу қажеттілігін арттыра түспек. Каспий тұйық теңіз болғанымен, аймақтағы мемлекеттердің санын ескерсек, ол гибридті қауіп-қатерлерден тыс қала алмайды. Бұл оқу-жаттығулар – күш көрсету емес, заманауи қатерлерге қарсы тактикалық бейімделудің ажырамас элементі.
