Астана. 14 қазан. ИНТЕРФАКС-ҚАЗАҚСТАН – Қазақстанның бір палаталы парламенті – Құрылтай сәрсенбі күні «2027–2029 жылдарға арналған республикалық бюджет туралы» заң жобасын бірінші оқылымда қарап, мақұлдады, деп хабарлайды агенттік тілшісі.
Қазақстан Ұлттық экономика министрлігінің мәліметінше, бюджетті әзірлеуге экономикалық дамудың базалық болжамы негіз болған. Оған сәйкес, 2027–2029 жылдары нақты жалпы ішкі өнімнің (ЖІӨ) жылдық орташа өсімі 5 пайыздан асады деп күтілуде. Ал атаулы ЖІӨ 2027 жылғы 199,3 трлн теңгеден 2029 жылы 245 трлн теңгеге дейін өседі.
Жылдық инфляцияның мақсатты дәлізі 2027 жылға 7,5–9,5 пайыз, ал 2028–2029 жылдарға 6–8 пайыз аралығында белгіленген.
2027 жылы мұнай секторындағы ұйымдардан Ұлттық қорға 3,78 трлн теңге түседі деп болжанып отыр. Бұл есеп мұнай өндіру көлемі 96 млн тонна, әлемдік нарықтағы мұнай бағасы барреліне 70 доллар, ал АҚШ долларының бағамы 480 теңге болады деген болжамға сүйеніп жасалған. Күтілетін түсім 2026 жылға арналған есептік көрсеткіштен 342 млрд теңгеге аз.
Ұлттық экономика министрлігінің болжамынша, трансферттерді есептемегенде, республикалық бюджеттің кірісі 2027 жылы 19,9 трлн теңгеге жетеді. Бұл биылғы көрсеткіштен 16,4 пайызға көп. 2028 жылы бюджет кірісі 21,7 трлн теңге, ал 2029 жылы 23,3 трлн теңге болады деп жоспарланған.
Ұлттық қордан республикалық бюджетке бөлінетін трансферттердің көлемі 2027 жылы 4,4 трлн теңге, 2028 жылы 3,9 трлн теңге, 2029 жылы 3,5 трлн теңге болып белгіленген.
Республикалық бюджеттің жалпы шығысы 2027 жылы 30,2 трлн теңге, 2028 жылы 29,4 трлн теңге, ал 2029 жылы 29,6 трлн теңге болады деп жоспарланып отыр.
Республикалық бюджет тапшылығы 2027 жылы 4,6 трлн теңге немесе ЖІӨ-нің 2,3 пайызы болады деп болжанған. Ал 2028 жылы бұл көрсеткіш 2,2 трлн теңгеге, 2029 жылы 1 трлн теңгеге дейін төмендейді деп күтілуде.
14 қазандағы ресми валюта бағамы – 1 АҚШ доллары үшін 448,45 теңге.
