Астана, 23 наурыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Таяу Шығыста бейтарап мемлекеттерді әскери қақтығысқа тартуға қарсы екенін мәлімдеді, деп хабарлады Мемлекет басшысының баспасөз қызметі.
Хабарламаға сәйкес, Тоқаев Қазақстандағы БАӘ елшісі Мұхаммед Саид Мұхаммед әл-Арикиді қабылдады.
«Қазақстан Таяу Шығыста бейтарап мемлекеттерді әскери іс-қимылдарға тартуға қарсы, эскалацияны тоқтатуға, БАӘ мен Парсы шығанағындағы осы қақтығысқа қатыспайтын елдердің егемендігі мен аумақтық тұтастығын бұзуға жол бермеуге және дағдарысты дипломатиялық жолмен реттеуге шақырады», – делінген кездесу қорытындысы бойынша таратылған хабарламада.
Президент қажет болған жағдайда ізгі ниет аясында бейбіт келіссөздер өткізу үшін алаң ұсынуға дайын екенін растады.
«Тоқаев Таяу Шығыстағы жағдайға, соның ішінде Иран тарапынан БАӘ аумағына жасалып жатқан бомбалауларға алаңдаушылық білдірді. Ол Қазақстан осы елдің азаматтық инфрақұрылымына жасалған қарулы шабуылдарды алғашқылардың бірі болып айыптағанын еске салды. Бұл туралы БАӘ Президенті шейх Мұхаммед бен Заид Әл Нахаянмен телефон арқылы сөйлесу барысында айтылған болатын», – деп хабарлады баспасөз қызметі.
Кездесу барысында Тоқаев Қазақстанның дәстүрлі достық және бауырластық қатынастарды дамытуға, сондай-ақ Біріккен Араб Әмірліктерімен өзара мүддеге сай кең ауқымды бағыттар бойынша ынтымақтастықты нығайтуға өзгермейтін бейілділігін атап өтті.
Президент екі елдің халықаралық күн тәртібіндегі негізгі мәселелер бойынша ұстанымдары сәйкес келетінін айтты.
Елші Мұхаммед Саид Мұхаммед әл-Арики Қазақстанның БҰҰ Жарғысының қағидаттарына берік ұстанымына және БАӘ мен Парсы шығанағы араб мемлекеттері ынтымақтастық кеңесіне мүше елдердің егемендігіне, аумақтық тұтастығына және қауіпсіздігіне көрсетіп отырған құрметіне ризашылығын білдірді.
