Астана. 1 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Шанхай ынтымақтастық ұйымының (ШЫҰ) халықаралық қауіпсіздікті қамтамасыз етуге бағытталған күш-жігерін Қазақстанның толық қолдайтынын мәлімдеді, деп хабарлады мемлекет басшысының баспасөз қызметі.
«Қазақстан ШЫҰ-ның негізгі мақсаттарын – тең құқықты көпполярлы әлемдік тәртіпті, қауіпсіздік пен тұрақтылықты, мемлекеттердің ішкі істеріне араласпау мен олардың егеменді даму құқығын тануды, әділ халықаралық сауда мен өзара тиімді инвестициялық ынтымақтастықты толық қолдайды… ШЫҰ-ның жарғылық құжаттарындағы негізгі қағидаттарға берік бола отырып, Қазақстан терроризм, сепаратизм және діни экстремизм сияқты «үш зұлымдыққа» қарсы күрестегі бірлескен күш-жігерді аса өзекті деп санайды», – деді Тоқаев ШЫҰ-ға мүше мемлекеттер басшылары кеңесінің отырысында сөйлеген сөзінде.
Қазақстан Президенті ШЫҰ-ны одан әрі дамытудың басым бағыттары жөніндегі өз көзқарасын таныстырып, бірінші кезектегі міндет ретінде стратегиялық әріптестік пен өзара қолдауды нығайтуды атады.
Тоқаев қауіпсіздік саласындағы ынтымақтастықты күшейтудің маңыздылығын атап өтті. Оның айтуынша, бұл бағыт – халықаралық терроризм, діни экстремизм, есірткі тасымалы, заңсыз көші-қон, киберқылмыс және өзге де деструктивті үдерістердің күшеюіне байланысты басымдыққа айналуда.
«Халықаралық қауіпсіздікке төнетін мұндай қатерлерді, оның ішінде «үш зұлымдықты» тек бірлескен іс-қимыл арқылы ғана жеңуге болады. Сондықтан Қазақстан ШЫҰ аясында қауіпсіздікке төнетін қатерлер мен сын-қатерлерге қарсы күрес жүргізетін төрт орталық құруды қолдайды. Сондай-ақ ШЫҰ мен Азиядағы өзара іс-қимыл және сенім шаралары жөніндегі кеңес арасындағы іскерлік байланыстарды күшейтудің маңызын атап өтеміз», – деді Мемлекет басшысы.
Тоқаев ШЫҰ мемлекеттерін Ауғанстанды қалпына келтіру, оны өңірлік және экономикалық үдерістерге тарту мақсатында гуманитарлық және техникалық көмек көрсетуді жалғастыруға шақырды. Ол Қазақстанның Ауғанстанда бірқатар инфрақұрылымдық және логистикалық жобаларды іске асыруға кіріскенін еске салды. Бұл жобалар ШЫҰ мемлекеттері арасындағы өзара байланыстарды нығайтуға мүмкіндік береді.
«Тамыз айының басында Алматыда БҰҰ Бас хатшысының қатысуымен Орталық Азия мен Ауғанстан үшін Тұрақты даму мақсаттары жөніндегі БҰҰ өңірлік орталығы ресми түрде ашылды. ШЫҰ-ға мүше мемлекеттерге осы Орталықтың әлеуетін бірлесіп пайдаланып, барлық басым бағыттар бойынша күш-жігерді үйлестіру мен өңірлік ынтымақтастықты жандандыруды ұсынамыз», – деді Қазақстан Президенті.
