Астана. 5 тамыз. ИНТЕРФАКС-ҚАЗАҚСТАН – Қазақстан Үкіметі 2025–2029 жылдарға арналған «Маңғыстау» туристік аймағын кешенді дамыту жоспарын бекітті, деп хабарлады Премьер-министрдің баспасөз қызметі.
Тиісті қаулыға Премьер-министр Олжас Бектенов қол қойды.
Құжат аясында саладағы бірқатар мәселені жүйелі түрде шешу көзделген. Атап айтқанда, инфрақұрылымды дамыту, логистика, цифрландыру, қауіпсіздікті қамтамасыз ету, кадр даярлау, инвестициялық жобаларды ілгерілету секілді тоғыз бағыт қамтылған. Жоспарды іске асыру кезеңінде 100-ден астам іс-шара ұйымдастыру жоспарланып отыр.
Өңірлік туризмді дамытудың негізгі бағыттарының бірі ретінде 12 болашағы бар туристік нысанның қатарынан Кендірлі туристік аймағы айқындалды. Мұнда инфрақұрылымдық мәселелерді шешуге бағытталған кешенді шаралар жүзеге асырылмақ. Атап айтқанда, инженерлік коммуникациялар жүргізу, туристік нысандарды электр қуатымен, сумен және көлік қатынасымен қамтамасыз ету көзделіп отыр. Жолдар мен өзге де нысандарды жаңғыртумен қатар, Кендірлі ауылында әуежай салу жоспарда бар. Бұл ретте инвесторлар мен экологиялық белсенділердің ұсыныстары ескерілген.
Ақтау қаласында халықаралық деңгейдегі теңіз вокзалы мен стадион салу жоспарланған. Өңірлік туризмді насихаттау мақсатында мәдени-спорттық іс-шаралар өткізу көзделуде. Кешенді жоспар туристерге қолайлы жағдай жасауға және туристік аймақты дамытуға бағытталған қолайлы инвестициялық ахуалды қалыптастыруға мүмкіндік береді.
Сонымен қатар, жоспар шағын және орта бизнесті дамытуға серпін береді. Туризм саласындағы кәсіпкерлік субъектілерін қолдау мақсатында «Каспий» ӘКК» АҚ желісі бойынша жеңілдетілген несие беру бағдарламасы іске қосылады.
Жоспарды жүзеге асыру нәтижесінде 2029 жылға қарай ішкі туристер саны 430 мыңнан 520 мың адамға дейін, шетелден келетін туристер саны 89 мыңнан 143 мың адамға дейін ұлғаяды деп күтілуде. Туризм саласында жұмыспен қамтылғандар саны 1,7 мыңнан 2,7 мың адамға дейін артып, жекеменшік инвестиция көлемі 198,9 млрд теңгеге жетеді. Өңір экономикасындағы туризмнің үлесі 2,2%-дан 3,6%-ға дейін өседі деп болжануда.
