Астана. 20 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қазақстанда вице-президент институтын енгізу туралы ұсыныс президенттік билік институтының әлсіреуін білдірмейді деп санайды.
«Айта кетуім керек, бұл конституциялық жаңашылдық президенттік билік институтының әлсіреуін білдірмейді. Керісінше, президент лауазымы мемлекеттік жүйедегі басты орын болып қала береді. Қазақстан президенттік республика ретінде табысты дамиды деп сенемін», – деді Тоқаев сейсенбі күні Қызылордада өткен V Ұлттық құрылтайда сөйлеген сөзінде.
«Президент Әкімшілігінің функционалы, құрылымы және басқару жүйесі саяси қажеттілікке сәйкес реформаланады. Өздеріңізге белгілі, вице-президент лауазымы бірқатар елдерде бар. Біздің жағдайда бұл қызметті енгізу мемлекеттік басқару үдерісін тұрақтандырып, билік иерархиясына қатысты түпкілікті айқындық енгізеді», – деп атап өтті мемлекет басшысы.
Бұған дейін Тоқаев Қазақстанда вице-президент лауазымын құруды ұсынған болатын.
Болжам бойынша, вице-президент президенттің тапсырмасы бойынша халықаралық форумдар мен келіссөздерде Қазақстанның мүддесін қорғайды, шетелдік мемлекеттердің делегацияларымен кездесулер өткізеді, парламентте президенттің өкілі болады, отандық және шетелдік қоғамдық-саяси, ғылыми және мәдени-ағартушылық ұйымдармен өзара іс-қимыл жасайды, сондай-ақ президенттің өзге де тапсырмаларын орындайды.
