Астана. 12 ақпан. ИНТЕРФАКС-ҚАЗАҚСТАН – 15 наурызға белгіленген республикалық референдумға дайындық және оны өткізу жөніндегі негізгі іс-шаралардың күнтізбелік жоспары Орталық референдум комиссиясының алғашқы отырысында бекітілді, деп хабарлайды «Интерфакс-Қазақстан» агенттігінің тілшісі.
Бекітілген жоспарға сәйкес, үгіт-насихат жұмыстары 12 ақпанда басталып, 14 наурыз күні сағат 00:00-де аяқталады.
21 ақпанда аумақтық және учаскелік комиссиялардың құрамы, сондай-ақ референдум учаскелерінің шекаралары туралы мәліметтер жарияланады. 22 ақпанда дауыс беруге арналған тізімдер комиссияларға беріледі.
Азаматтарды дауыс беру уақыты мен орны туралы хабардар ету 27 ақпан мен 4 наурыз аралығында жүргізіледі.
Дауыс беру алдындағы «тыныштық күні» дәстүр бойынша 14 наурызға сәйкес келеді.
Орталық сайлау комиссиясының мүшесі Мұхтар Ерманның айтуынша, референдум нәтижелері дауыс беру өткен күннен бастап жеті күннен кешіктірілмей, яғни 21 наурызға дейін жарияланады.
Бұған дейін Қазақстанда жаңа Конституцияны қабылдау жөніндегі республикалық референдум 15 наурызға тағайындалғаны хабарланған еді.
