АСТАНА. 10 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Душанбеде өткен ТМД саммитінде климаттық және техногендік сипаттағы төтенше жағдайларды алдын ала болжауға арналған өңірлік орталық құруды ұсынды.
«Климаттық және техногендік сипаттағы төтенше жағдайларды болжау жөніндегі Өңірлік орталық құру арқылы күш-жігерімізді біріктіруді ұсынамыз. Қазіргі уақытта Каспий теңізінің қарқынды тартылуы алаңдатарлық жағдайға айналды. Бұл енді тек өңірлік деңгейдегі емес, жаһандық сипаттағы мәселе», – деді Тоқаев, деп хабарлайды Президенттің баспасөз қызметі.
Мемлекет басшысы өз сөзінде Каспий теңізінің су ресурстарын сақтау жөніндегі мемлекетаралық бағдарламаны әзірлеуге өзге де елдерді атсалысуға шақырды.
«Бұл маңызды құжатты дайындауға каспий маңы елдерінен бөлек, мүдделі мемлекеттер мен халықаралық ұйымдарды да тартуға болады», – деп атап өтті Президент Тоқаев.
