Вашингтон. 27 қазан. ИНТЕРФАКС —
АҚШ президенті Дональд Трамп Еуропалық одақта Ресей активтерін Украина мүддесіне қолдану жөніндегі бастама талқыланып жатқанымен, бұл мәселеге АҚШ араласпайтынын мәлімдеді.
Президент журналистердің сұрағына жауап бере отырып: «Бұл жөнінде Еуропадан сұраңыздар. Біз бұл процеске қатысып отырған жоқпыз», — деді.
Естеріңізге салсақ, бұған дейін Еурокомиссия Брюссельдегі Euroclear депозитарийінде жатқан 170 млрд еуро көлеміндегі Ресей активтерін пайдалану мүмкіндігін қарастырып жатқаны хабарланған. Соның 140 млрд еуросын Украинаға репарациялық несие ретінде бағыттау ұсынылған болатын.
Бұл жоспар Бельгияда алаңдаушылық тудырды. Ел премьер-министрі Барт де Вевер активтерді бұлай қолдану заңдық тұрғыдан тәркілеуге ұқсайтынын, сондықтан ел үшін үлкен тәуекел екенін айтып, ЕО-дан қосымша кепілдіктер сұрады.
Осыған байланысты Еурокомиссия төрайымы Урсула фон дер Ляйен Брюссель саммитінен кейін: “ел басшылары бұл бастаманы іске асыру үшін әлі де нақтылауды қажет ететін тұстар бар екенін атап өтті”, — деп мәлімдеді.
