Қазақстан Республикасы Өнеркәсіп және құрылыс министрлігі хабарлайды: The World Financial Review беделді халықаралық басылымы Қазақстанның жаһандық экономикадағы рөлі тұрақты түрде өзгеріп келе жатқанын атап өтті. Ел бұрынғыдай тек дайын өнім тұтынатын нарықтан өңірлік өнеркәсіптік платформаға, экспортқа бағдарланған өндіріс орталығына айналып отыр. Жаһандық жеткізу тізбектерінің қайта құрылуы аясында халықаралық компаниялар Қазақстанды Орталық Азия, Еуразиялық экономикалық одақ және көршілес өңірлер нарықтарына шығуға мүмкіндік беретін өндірістерді жергіліктендіру алаңы ретінде жиі қарастыра бастады. Басылымда экономиканың құрылымдық жаңғыруы өңдеу өнеркәсібінің өсуіне негізделіп отырғаны көрсетіледі. Атап айтқанда, 2025 жылы бұл сектордағы өсім шамамен 6 пайыз деңгейінде күтілуде, ал 2026 жылға арналған мақсатты көрсеткіш – 6,2 пайыз. Негізгі салаларда да тұрақты серпін сақталуда. Басылым сарапшыларының болжамына сәйкес, 2026 жылы металлургия саласының өсімі шамамен 3 пайызды, машина жасау саласының өсімі – 13,4 пайызды, ал жаңа өндірістік қуаттардың іске қосылуы есебінен химия өнеркәсібінің өсімі 7 пайызды құрайды. Сондай-ақ халықаралық компаниялардың Қазақстанда өндірістерін белсенді түрде жергіліктендіруі ерекше атап өтіледі. Қазіргі уақытта үй жануарларына арналған жем өндірісі, фармацевтикалық өнімдер шығару, толық циклді автокөлік өндірісі, локомотивтер мен металл өнімдерін өндіру жобалары іске асырылуда. Жекелеген жобалар бойынша инвестиция көлемі 100 млрд теңгеден асады, ал автокөлік өнеркәсібіндегі инвестициялар экспортқа бағдарлана отырып, 270 млн АҚШ долларына жетіп отыр.
Евразия24 пікірі:
Жалпы алғанда, бұл Қазақстанның өңірлік деңгейде өнеркәсіптік бәсекеде алдыңғы қатарға шыққанын мойындау болып табылады. Бұл – үш тараптың мүддесі тоғысқан сирек сәт. Мемлекет үшін бұл – тұрақты жұмыс орындарын құруға және экспорттық әлеуетті арттыруға мүмкіндік беретін, қағаз жүзіндегі емес, нақты экономикалық әртараптандыру жолы. Халықаралық бизнес үшін – жеткізу тізбектерін қайта құру және саяси тұрғыдан бейтарап өнеркәсіптік алаң арқылы Еуразиялық экономикалық одақ нарығына кедендік кедергілерсіз қол жеткізу мүмкіндігі. Сонымен қатар, ЕАЭО шеңберінде ғана емес, одан тыс өңірлерде де бәсекеге қабілетті өнімге деген сұранысты игеру перспективасы бар. Мұндай өнім арзан жұмыс күші мен білікті кадрлары жеткілікті елде өндіріліп отыр. Ендігі кезекте Қазақстан үшін басты міндет – «даңқтың жетегінде кетпей», инфрақұрылымды дамытуды жалғастыру және инвесторлар үшін түсінікті әрі болжамды ойын ережелерін қалыптастыру.
