Вашингтон. 5 мамыр. ИНТЕРФАКС – Иран отты тоқтату туралы келісімге қол қойылған сәттен бастап американдық әскерлерге 10-нан астам рет шабуыл жасады. Бұл туралы сейсенбі күні өткен баспасөз мәслихатында АҚШ Қарулы Күштері Штаб бастықтары біріккен комитетінің (ШББК) төрағасы, генерал Дэн Кейн мәлімдеді.
«8 сәуірде отты тоқтату туралы келісім жасалғаннан бері Иран сауда кемелеріне тоғыз рет оқ жаудырып, екі контейнер тасығыш кемені басып алды және американдық әскерлерге 10 рет шабуыл жасады», — деді генерал.
Сонымен қатар ол бұл әрекеттердің әзірге ауқымды әскери қимылдардың қайта басталу шегінен төмен екенін атап өтті.
Генерал Иранның соңғы жеті апта ішінде әлемдік экономикаға соққы беру мақсатында коммерциялық кемелерге бірнеше рет қауіп төндіріп, шабуыл жасағанын қадап айтты. «Иран жаһандық жеткізілім тізбегін қару ретінде қолданып, бүкіл әлемдік экономиканы «тұтқынға алуға» әрекеттеніп отыр», — деп толықтырды ол.
Дэн Кейннің хабарлауынша, дүйсенбі күні Парсы шығанағында бөгеліп қалған сауда кемелерінің Ормуз бұғазы арқылы шығуын қамтамасыз етуге бағытталған «Бостандық» (Свобода) миссиясының алғашқы күнінде американдық кемелерге жасалған шабуылдар сәтті тойтарылды. Зымырандар, ұшқышсыз ұшу аппараттары және жүрдек катерлер қолданылған шабуылдарға американдық тікұшақтар қарсы тұрған.
Оның айтуынша, қазіргі уақытта Парсы шығанағында бұғаз арқылы өте алмай тұрған 1550 сауда кемесінде 22,5 мың теңізші бөгеліп қалған.
