Астана. 13 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «QazaqGaz» ұлттық компаниясы басқарма төрағасы Әлібек Жамауовтың есебін тыңдап, бірқатар тапсырма берді, деп хабарлады Мемлекет басшысының баспасөз қызметі.
«Президент жылыту маусымында халықты және ел экономикасын тұрақты газбен қамтамасыз ету жөнінде шаралар қабылдауды, цифрлық технологиялар мен жасанды интеллектіні енгізуді жандандыруды, сондай-ақ газ саласының ресурстық базасын кеңейту бағытындағы жұмысты жалғастыруды тапсырды», – делінген хабарламада.
«QazaqGaz» басшысы өз кезегінде газ тұтынудың артуын және газ өңдеу қуаттарын ұлғайту қажеттілігін ескере отырып, өткен жылы негізгі басымдық геологиялық барлау жұмыстарына және күрделі құрылысқа берілгенін Президентке баяндады.
Сонымен қатар Астана қаласын және агломерацияны газдандыруды қоса алғанда, газ инфрақұрылымын кеңейту де басым бағыттардың қатарында болды.
Жамауовтың айтуынша, өткен жылы шамамен 400 мың адам табиғи газға қол жеткізді, 112 елді мекен қосылды.
2025 жылғы маңызды оқиғалардың бірі – Талдықорған – Үшарал магистральдық газ құбырының құрылысы белгіленген мерзімнен 1 жыл 4 ай бұрын аяқталды. Оның іске қосылуы Жетісу облысындағы 84 елді мекенді табиғи отынмен қамтамасыз етіп, өңірді газдандыру деңгейін 76%-ға дейін арттыруға мүмкіндік береді.
Сондай-ақ ол Бейнеу – Бозой – Шымкент магистральдық газ құбырының екінші желісі мен жылдық қуаты 1 млрд текше метр болатын Қашаған газ өңдеу зауыты сияқты ірі инфрақұрылымдық жобалардың іске асырылу барысы туралы баяндады.
Мемлекет басшысының газ саласының ресурстық базасын дамыту жөніндегі тапсырмаларын орындау аясында Жамбыл облысындағы Малдыбай кен орнында жұмыстар жүргізіліп, Амангелді тобы құрамындағы Барханная кен орны пайдалануға берілді.
«QazaqGaz» ҰК» АҚ – Қазақстандағы газ тасымалдау және газ тарату желісінің ұлттық операторы. Компания халықаралық транзитті қамтамасыз етеді, ішкі және сыртқы нарықтарда газ сатады, құбырлар мен газ қоймаларын жобалайды, қаржыландырады, салады және пайдаланады. «QazaqGaz» «Самұрық-Қазына» қорының құрамына кіреді.
