Астана. 13 қаңтар. ИНТЕРФАКС–ҚАЗАҚСТАН — Қазақстанның барлық қалалары мен ауылдары ауыз сумен қамтылған. Бұл туралы Өнеркәсіп және құрылыс вице-министрі Қуандық Қажкенов мәлімдеді.
Сейсенбі күні өткен Үкімет отырысында ол республикалық бюджеттен 1,6 мыңнан астам жобаны іске асыруға шамамен 835 млрд теңге бөлінгенін, оның ішінде 132 млрд теңге Арнаулы мемлекеттік қор арқылы қайтарылған активтер есебінен бөлінгенін атап өтті. Осы қаражат есебінен 34 қала мен 756 ауылдық елді мекен орталықтандырылған сумен жабдықтау жүйесіне қосылған. Бұған қосымша жергілікті бюджеттер есебінен 699 ауылда кешенді блок-модульдер орнатылған. Салыстыру үшін: 2021 жылы ауыл халқының 90 пайызы, қала халқының 97,5 пайызы ғана су жүйесіне қол жеткізген еді.
«Осылайша Мемлекет басшысының тапсырмасымен белгіленген мақсатты көрсеткішке қол жеткізілді. Қазіргі таңда елдегі 90 қала мен 6 087 ауылдық елді мекен, яғни 7,5 млн адам толық көлемде ауыз сумен қамтамасыз етілді», — деді Қуандық Қажкенов.
Оның мәліметінше, жалпы 4 747 ауыл орталықтандырылған су жүйесіне қосылған, бұл ауыл халқының 96 пайызын қамтиды. Ал 1 340 ауыл орталықтандырылмаған су жүйелері арқылы қамтылған (ауыл халқының 4 пайызы), оның ішінде су тазарту модульдері, жеке ұңғымалар және су тасымалдау жүйелері бар.
13 қаңтардағы ресми айырбас бағамы — 1 АҚШ доллары үшін 509,84 теңге.
