АСТАНА. 23 қаңтар. ИНТЕРФАКС-ҚАЗАҚСТАН – Қазақстанда ауыл шаруашылығы саласын қаржыландыруға қатысты 2023–2024 жылдарға арналған аудит қорытындысы 300 млрд теңге көлемінде заңбұзушылықтарды анықтады. Бұл туралы Үкіметтің баспасөз қызметі хабарлады.
Аудит деректеріне сәйкес, оның ішінде 32 млрд теңге – тікелей мемлекет бюджетіндегі шығындар. Жалпы екі жыл ішінде агроөнеркәсіп кешенін мемлекеттік қолдауға шамамен 1,2 трлн теңге бөлінген.
Тексеру нәтижесінде ауыл шаруашылығына берілетін субсидиялар жүйесінде 5,5 млрд теңге көлеміндегі көлеңкелі схемалар әшкереленді. Атап айтқанда, 11 өңірде бір ірі қара мал басының бірнеше рет жалған сатылғаны тіркелген. Бұл операциялардың жалпы сомасы – 808,1 млн теңге.
Бюджеттік несиелер есебінен жүзеге асырылған АӨК-тің инвестициялық жобалары бойынша 13,3 млрд теңгеге жуық заңбұзушылық анықталды. Атап айтқанда, кей жағдайларда мал мен жабдықтар мүлде жеткізілмеген немесе келісімшарттағы көлемнен аз көлемде келген. Сондай-ақ кейбір құрылыс жұмыстары құжат жүзінде төленгенімен, нақты орындалмаған.
Аудит барысында шағын несие беру саласында да өрескел заңбұзушылықтар тіркелген. Мәселен, мерзімі өткен қарыздары бар және мүліктеріне тыйым салынған тұлғаларға несие берілген. Осындай 25 қарыз алушы жалпы 45,8 млн теңге берешегі бола тұра, қосымша 177,7 млн теңге көлемінде несие алған.
Бұған қоса, жыл сайынғы көлемі 140 млрд теңге болатын егіс және жинау жұмыстарына бағытталған қаржыландыру бағдарламаларының тиімділігі төмен екені белгілі болды. Бұл бағытқа жауапты «Аграрлық несие корпорациясы» фермер шығындарының 70%-ын жабуды қамтамасыз ете алмай отыр. Қаражат көптеген қарыз алушылар арасында тым ұсақ көлемде бөлінгендіктен, толыққанды агрожұмыстарды жүргізуге мүмкіндік бермейді.
Анықталған заңбұзушылықтарға қатысты материалдар құқық қорғау органдарына процессуалдық шешімдер қабылдау үшін жолданды.
23 қаңтардағы ресми валюта бағамы: 1 АҚШ доллары – 505,71 теңге.
