Астана. 26 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев жеке деректердің жиі таралуы жағдайында оларды қорғауды жүйелі түрде ұйымдастыру қажеттігін және жалпы киберқылмысқа қарсы күрес әдістерін түбегейлі қайта қарау керек екенін айтты.
«Ақпараттық кеңістікте азаматтардың жеке деректерінің таралу жағдайлары жиілеп кетті. Жеке мәліметтерді барынша қорғау үшін бұл жұмысты жүйелі негізде жүргізу қажет», – деді Мемлекет басшысы дүйсенбі күні Астанада Бас прокуратурада өткен кеңесте.
Сондай-ақ Президент киберқылмысқа қарсы іс-қимыл тәсілдерін түбегейлі қайта қараудың маңызын атап өтті.
«Әлемде киберқылмыстың ауқымы кеңейіп келеді, оның құрбаны жыл сайын мыңдаған қазақстандық болып отыр. Қазіргі таңда онлайн-алаяқтыққа қатысты қылмыстардың тек әрбір бесіншісі ғана ашылады, бұл өте төмен көрсеткіш. Киберқылмысқа қарсы күрес тәсілдерін түбегейлі қайта қарау қажет. Цифрлық саладағы сын-қатерлерге жауап беру үшін құқық қорғау органдары алдын ала әрекет етуі тиіс. Инновациялық тұрғыда ойлау қажет, бұл мәселеде кейін қалуға жол берілмейді», – деп атап өтті Президент.
