Астана. 27 қаңтар. ИНТЕРФАКС-ҚАЗАХСТАН – Қазақстан Президенті Қасым-Жомарт Тоқаев Холокост құрбандарын еске алудың халықаралық күніне орай Израиль Президенті Ицхак Герцогқа жеделхат жолдады. Бұл туралы сейсенбі күні Қазақстан басшысының баспасөз қызметі хабарлады.
Өз жолдауында Қасым-Жомарт Тоқаев Қазақстан Холокост жылдарында қаза тапқан миллиондаған жазықсыз құрбандардың рухын құрметтейтінін атап өтті.
«Этностық және діни өшпенділік пен зорлық-зомбылықтың кез келген көрінісін қатаң айыптай отырып, еліміз адамзатқа қарсы мұндай қылмыстардың қайталануына жол бермеу бағытындағы халықаралық қоғамдастықтың бірлескен күш-жігерін қолдайды», – делінген баспасөз қызметі таратқан жеделхаттан үзіндіде.
Сондай-ақ Тоқаев «Холокост жылдарында эвакуацияланған көптеген еврейлер үшін Қазақстан пана болды, ал бүгінде еврей қауымы қоғамымыздың ажырамас бөлігіне айналды» деп атап өтті.
