Астана. 28 қаңтар. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен пленарлық отырыста «Түркі мемлекеттері ұйымының азаматтық қорғау тетігін құру туралы келісімді ратификациялау туралы» заңды қабылдады.
Аталған келісім 2024 жылғы 6 қарашада Бішкек қаласында қол қойылған.
Мәжілістің экология және табиғатты пайдалану мәселелері жөніндегі комитетінің қорытындысында атап өтілгендей, құжаттың мақсаты – Түркі мемлекеттері ұйымына мүше елдер мен байқаушы мемлекеттердің, сондай-ақ өзге де мемлекеттердің аумағында туындауы мүмкін табиғи апаттар мен төтенше жағдайларға бірлесіп ден қою тетігін қалыптастыру.
Төтенше жағдайлар жөніндегі вице-министр Кеген Тұрсынбаевтің айтуынша, құжат төтенше жағдайлардың алдын алу және олардың салдарын жою саласында тиімді халықаралық өзара іс-қимыл тетігін құруға бағытталған.
«Көмек зардап шеккен мемлекеттің өтініші бойынша және ерікті негізде көрсетіледі, ал көмек көрсету туралы шешімдер консенсус арқылы қабылданады», – деп атап өтті ол.
Азаматтық қорғау тетігінің негізгі функцияларына жедел ден қою, адамдардың өмірі мен мүлкін құтқару, медициналық көмек көрсету, шұғыл байланыс, мониторинг пен талдау жүргізу, уақытша паналау орындарын ұсыну, апаттар мен төтенше жағдайлар кезінде гуманитарлық көмек көрсету, сондай-ақ алдын алу, дайындықты қамтамасыз ету және апаттарға ден қою жөніндегі білім мен тәжірибе алмасу кіреді.
Тетіктің әкімшілік жұмыс органдары ретінде министрлер кеңесі мен хатшылық айқындалған, ал хатшылықтың штаб-пәтері Стамбул қаласында орналасқан. Министрлер кеңесін Түркі мемлекеттері ұйымына төрағалық ететін мемлекеттің төтенше жағдайлар жөніндегі ведомство басшысы басқарады.
Қабылданған заң Сенаттың қарауына жолданады.
