Астана. 28 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев қазақстандық IT-кәсіпкерлер Ерзат Дулат пен Мурат Абдрахмановты қабылдады. Бұл туралы мемлекет басшысының баспасөз қызметі хабарлады.
Сәрсенбі күні таратылған хабарламада айтылғандай, Президент Қасым-Жомарт Тоқаевтың Higgsfield AI стартапының техникалық директоры Ерзат Дулатпен және MA7 Ventures венчурлық платформасының негізін қалаушы Мурат Абдрахмановпен кездесуі барысында жасанды интеллектіні экономикада, мемлекеттік басқару жүйесінде және әлеуметтік салада жүйелі түрде енгізу, сондай-ақ IT-кәсіпкерлікті, венчурлық және AI-индустрияны дамыту мәселелері талқыланды.
Мемлекет басшысы Higgsfield AI стартапының жетістіктерін жоғары бағалап, Қазақстанда жасанды интеллект саласында жаһандық деңгейде көшбасшы бола алатын компаниялардың пайда болуының маңызын атап өтті.
Президенттің айтуынша, негізгі міндет – Қазақстанды IT-компаниялар үшін тез іске қосылып, ауқымын кеңейтіп, халықаралық нарықтарға шығуға мүмкіндік беретін қолайлы алаңға айналдыру.
Өз кезегінде Ерзат Дулат Higgsfield командасының шамамен 95%-ын қазақстандықтар құрайтынын айтып, бұл ел жастарының жоғары әлеуетін көрсететінін жеткізді. Ол AI-индустриясы үшін кадрлар даярлау және бірлескен білім беру бастамаларын іске асыруда мемлекетпен серіктес болуға дайын екенін растады.
Мурат Абдрахмановтың айтуынша, қазіргі таңда венчурлық индустрия мемлекеттердің технологиялық дамуын қамтамасыз ететін маңызды құралға айналып отыр. Осы тұрғыда Қазақстанның жаһандық венчурлық индустрияның толыққанды қатысушысы болуға нақты мүмкіндігі бар.
Higgsfield AI – құны 1 млрд АҚШ долларынан асатын алғашқы қазақстандық «бірмүйізді» компания. Ал қалыптасу кезеңінде MA7 Ventures бұл стартапқа бірнеше миллион доллар инвестиция салған.
