Астана. 29 қаңтар. ИНТЕРФАКС-ҚАЗАҚСТАН – Қазақстан Президентінің жаңа баспасөз хатшысы болып Айбек Смадияров тағайындалды. Бұл туралы бейсенбі күні мемлекет басшысының баспасөз қызметі хабарлады.
«Мемлекет басшысының өкімімен Смадияров Айбек Серікбайұлы Қазақстан Республикасы Президентінің кеңесшісі – Президенттің баспасөз хатшысы болып тағайындалды. Ол бұрын атқарған қызметінен босатылды», – делінген баспасөз қызметінің хабарламасында.
42 жастағы Айбек Смадияров 2025 жылғы желтоқсанда Президент Әкімшілігінің ішкі саясат бөлімінің меңгерушісі болып тағайындалған. Бұған дейін ол Қазақстан Сыртқы істер министрлігінің халықаралық ақпарат комитетінің төрағасы, ведомствоның ресми өкілі қызметтерін атқарған.
Сонымен қатар Президент Руслан Желдібайды Президенттің көмекшісі – баспасөз хатшысы қызметінен босату туралы өкімге қол қойды. Руслан Желдібай бұл лауазымды 2025 жылғы ақпан айынан бері атқарып келген.
