Вашингтон. 3 ақпан. ИНТЕРФАКС – Германия Федеративтік Республикасына қорғаныс мүмкіндіктерін ғарыш кеңістігінде де күшейту қажет. Бұл туралы Бундесвердің Ғарыш күштерінің қолбасшысы, генерал-майор Михаэль Траут CNBC телеарнасына берген сұхбатында мәлімдеді.
«Қазіргі кезеңде біз ғарыш кеңістігін пайдалану кезіндегі қауіпсіздік пен қорғаныс аспектілеріне басымдық береміз. Бұл өзіміздің дербес әскери әлеуетіміздің болуын талап етеді», – деді ол Сингапур әуе көрмесіне келген сәтінде.
Оның айтуынша, Германия үкіметі осы мақсаттарға 2030 жылға дейінгі кезеңге 35 млрд еуро бөлуді көздеп отыр. Сонымен қатар, бірқатар жабдықтарды неміс билігі халықаралық және еуропалық нарықтардан сатып алуды жоспарлауда.
Траут Германияның әскери жоспарлауындағы өзгерістерге соңғы бес жылдағы оқиғалар, соның ішінде Украина төңірегіндегі жағдай елеулі ықпал еткенін атап өтті. Генерал-майордың айтуынша, Бундесверге 2029 жылдан кешіктірмей толық жауынгерлік әзірлікті қамтамасыз ету міндеті жүктелген, осыған байланысты қолбасшылық қорғаныс қабілетіндегі олқылықтарды жедел түрде толықтыруы тиіс.
Сонымен қатар ол Германияның әскери салада АҚШ-пен тиімді ынтымақтастығын жалғастырып отырғанын атап өтті.
