Астана. 4 ақпан. ИНТЕРФАКС-ҚАЗАҚСТАН – Пәкістан Қазақстан үшін Оңтүстік Азиядағы маңызды әрі сенімді серіктес, екі елдің көпқырлы ынтымақтастықты кеңейтуге толық мүмкіндігі бар. Бұл туралы Қазақстан Президенті Қасым-Жомарт Тоқаев мәлімдеді.
Президент бұл сөзін сәрсенбі күні Исламабадта Пәкістан Премьер-министрі Шахбаз Шарифпен кеңейтілген құрамда өткен келіссөздер барысында айтты. Оның айтуынша, бұл – оның Қазақстан Президенті ретіндегі алғашқы мемлекеттік сапары және ол екі ел арасындағы уақыт сынынан өткен әріптестікте маңызды кезең болып табылады. Мемлекет басшысы халықтар арасындағы достықтың Ұлы Жібек жолы бойындағы ғасырлар бойғы өзара ықпалдастық пен кең ислам өркениеті аясында қалыптасқанын ерекше атап өтті.
Тоқаев Қазақстан тәуелсіздігінің алғашқы жылдарынан бастап Пәкістанның Оңтүстік Азиядағы маңызды әрі сенімді серіктес екенін еске сала отырып, Астана мен Исламабадтың екіжақты байланыстарға жаңа серпін беруге барлық алғышарттары бар екеніне сенім білдірді.
Сондай-ақ ол Пәкістанға өкілді делегациямен және сауда-экономикалық әрі инвестициялық ынтымақтастықты едәуір арттыруға, сондай-ақ өзге де басым бағыттардағы өзара іс-қимылды дамытуға арналған нақты ұсыныстар топтамасымен келгенін атап өтті.
Хабарламада Қасым-Жомарт Тоқаевтың Пәкістан Премьер-министрін биыл Қазақстанға мемлекеттік сапармен келуге шақырғаны, сондай-ақ қол жеткізілген уағдаластықтардың іске асырылу нәтижелерін қорытындылау және екіжақты қатынастарды одан әрі нығайту жөніндегі келесі қадамдарды айқындау үшін жоғары мәртебелі мейманды қабылдауға дайын екенін растағаны айтылған.
Өз кезегінде Шахбаз Шариф Қазақстан мен Пәкістанның сауда-экономикалық ынтымақтастықты дамытуда, оның ішінде энергетика, өнеркәсіп, ауыл шаруашылығы, көлік және цифрландыру салаларында айтарлықтай әлеуетке ие екенін атап өтті.
