Вашингтон. 5 ақпан. ИНТЕРФАКС – АҚШ президенті Дональд Трамп АҚШ пен Иран арасындағы қазіргі шиеленіс Иранның жоғарғы рухани жетекшісі аятолла Али Хаменеи үшін елеулі қауіп факторы екенін мәлімдеді.
«Бұл жағдай оны шындап алаңдатуы керек деп ойлаймын. Иә, дәл солай. Себебі қазір олар бізбен келіссөздер жүргізіп жатыр», – деді Трамп NBC телеарнасына берген сұхбатында.
Бұған дейін АҚШ басшысы Иран ядролық бағдарламасын қайта іске қосуға талпынса, Вашингтон қатаң жауап шараларын қабылдауға дайын екенін ескерткен болатын.
Бұл мәлімдеме Иран мен АҚШ арасындағы келіссөздерге дайындық жүріп жатқан кезеңде жасалды. Келіссөздер жұма күні өтуі тиіс. Алайда бірқатар бұқаралық ақпарат құралдарының хабарлауынша, тараптар әлі күнге дейін келіссөздердің мазмұны мен өтетін орны бойынша ортақ келісімге келе алмай отыр.
Axios порталының дерегінше, келіссөздердің жалғасуына бірнеше араб елінің басшылары ықпал еткен. Олар Трампты бұл диалогтан бас тартпауға көндірген. Соған қарамастан, АҚШ ішінде келіссөздердің нәтижелілігіне қатысты күмән сақталып отыр.
Иранның сыртқы істер министрі Аббас Аракчи кездесудің жұма күні Маскат қаласында өтетінін растады.
Айта кетейік, Тегеран мен Вашингтон бұған дейін бес раунд келіссөз өткізген. Ал алтыншы раунд 2025 жылғы маусымда Израиль мен АҚШ-тың Иран аумағына жасаған соққыларынан кейін өтпей қалған еді.
