Астана. 5 ақпан. ИНТЕРФАКС-ҚАЗАҚСТАН – Қазақстан Ресей мен Украина арасындағы қақтығыста делдал рөлін өзіне алуға ниетті емес, дегенмен қажет болған жағдайда келіссөздер өткізу үшін бейтарап алаң ұсынуға әзір. Бұл туралы Қазақстан Президенті Қасым-Жомарт Тоқаев Пәкістанның The News International газетіне берген сұхбатында мәлімдеді.
«Біздің ел делдал болуға талпынбайды. Алайда Қазақстан әрдайым қолдау көрсетуге, соның ішінде мүмкіндік туған жағдайда келіссөздер жүргізуге арналған бейтарап алаң ұсынуға дайын», – деді Мемлекет басшысы Ресей мен Украина арасындағы жанжалды реттеуде өзін делдал ретінде көре ме деген сұраққа жауап бере отырып.
Сұхбат мәтінін бейсенбі күні Қазақстан Президентінің баспасөз қызметі таратты.
Президент қақтығыстың қазіргі жағдайын аса күрделі деп бағалап, негізгі түйін аумақтық мәселеге тіреліп отырғанын атап өтті. Оның айтуынша, Қазақстан бұл жанжалды тек саяси және дипломатиялық жолмен реттеуді дәйекті түрде қолдап келеді.
«Бейбітшілікке жетудің жалғыз жолы – қақтығысушы тараптарды келіссөз үстеліне отырғызу», – деп түйіндеді Қасым-Жомарт Тоқаев.
