Астана қаласының әкімдігі хабарлайды: Елордалық мұғалім Еуропа елдерінде тұратын қазақ балаларына ана тілін тегін үйретіп жүр. Оқушылардың жасы әртүрлі болғанына қарамастан, педагог сабақ барысында тақырыпты жан-жақты түсіндіріп, балалардың қызығушылығын арттыруға ерекше мән береді. Ол бұл еңбегін өзінің азаматтық әрі кәсіби борышы деп санайды. Гүлжазира Бекболатқызы – Астанадағы №104 «Келешек мектебі» жалпы білім беретін мектебінің қазақ тілі мен әдебиеті пәні мұғалімі. Біліктілігін арттыру мақсатында Германияға барған сапары кезінде ол шетелде тұратын отандастарымен танысып, олардың балаларының ана тілін үйренуге ынталы екенін байқайды. Осыдан кейін ұстаз білімін ерікті түрде, ақысыз негізде бөлісуді ұйғарып, онлайн сабақтар өткізе бастайды. «2023 жылы Еуропаға барған сапарымнан кейін шетелдегі қазақ балаларына сабақ беру ойы келді. 2024 жылдың 1 маусымынан бастап бұл істі негізгі жұмысыммен қатар алып жүрмін. Әр жексенбі күні Нидерланд пен Германияда тұратын қазақ балаларына онлайн форматта ана тілі сабағын өткіземін. Күнделікті өмірде олар тұрған елінің тілінде сөйлейтіндіктен, қазақшада акцент байқалады. Соған қарамастан, ана тілін үйренуге деген ынталары ерекше. Мұны мен ұстаз ретіндегі парызым деп білемін», – дейді Гүлжазира Бекболатқызы.
Еуразия24 пікірі:
Ана тілін ардақтау, елден жырақта жүрсе де Отанын ұмытпаған балаларға деген қамқорлық – елордалық ұстаздың ісінен айқын көрінеді. Оның бастамасы өзгелерге үлгі боларлық азаматтық ұстанымды көрсетеді. Қазақ тілін дамыту жолында жалғыз өзі еңбек етіп жүргендей әсер қалдырғанымен, Гүлжазира Бекболатқызы бұл бағытта жалғыз емес. 2017 жылғы Үкімет қаулысына сәйкес құрылған «Отандастар» коммерциялық емес қоры шетелдегі қазақтарға алты жылдан бері онлайн форматта ана тілін тегін үйретіп келеді. Қазіргі уақытта онлайн сабақтар Ресей, Түркия, Франция, Ұлыбритания, Бельгия, Моңғолия, Германия, АҚШ, Беларусь, Иран және Қырғызстанда жүргізіледі. Диаспораны қолдау аясында қор қазақ тілі мен әдебиеті бойынша халықаралық олимпиадалар ұйымдастырып, түрлі шығармашылық байқаулар өткізеді. Бұл бастамалар шетелде тұратын отандастарымыздың тарапынан зор қолдау табуда. Адам туған жерінен қанша алыстаса да, жүрегінде туған еліне деген махаббат мәңгі қалмақ.
