Брюссель. 13 ақпан. ИНТЕРФАКС — Еуропа тұрғындары өз қауіпсіздігіне төнетін қатердің күшейіп келе жатқанын сезінеді. Мұндай қорытынды Eurobarometer әлеуметтік зерттеу қызметінің сауалнамасында келтірілген.
Еуропалық комиссия жұма күні таратқан баспасөз хабарламасында «сауалнаманың ең назар аударарлық нәтижесі — еуропалықтардың үштен екісінен астамы (68%) өз елін қауіп-қатер жағдайында деп есептейтіні» атап өтілген.
Деректерге сәйкес, қауіп деңгейін қабылдау көрсеткіші ең жоғары елдер қатарында Франция (80%) көш бастап тұр. Одан кейін Нидерланд пен Дания (77%), сондай-ақ Кипр мен Германия (75%) орналасқан.
Еуропалықтардың басым бөлігі қауіпсіздік пен қорғанысты нығайту мәселесінде Еуропалық Одаққа сенім білдіреді (52%). Бұл көрсеткіш әсіресе Люксембург (76%), Португалия (74%), Кипр (73%) және Литва (71%) елдерінде жоғары.
Респонденттердің шамамен төрттен үш бөлігі (74%) ЕО-ның қорғаныс саласына қазіргі инвестициялар деңгейін қолдайды немесе бұл шығындарды арттыру қажет деп санайды. Қолдау деңгейі Португалия (89%), Финляндия (83%), Испания (80%), Литва (80%) және Дания (78%) сияқты елдерде айрықша жоғары.
Еуропалық комиссияның мәлімдеуінше, бұл сауалнама нәтижелері комиссия қызметінде бағдар ретінде пайдаланылып, нақты деректерге негізделген шешім қабылдауға ықпал ететін болады.
