«Азиатский экспресс» басылымының хабарлауынша, Global Soft Power Index 2026 рейтингі бойынша Қазақстан Орталық Азиядағы ең ықпалды мемлекет атанды. Global Soft Power Index 2026 рейтингі елдердің мәдениеті, құндылықтары, саясаты, бизнесі және жалпы беделі арқылы әлемдік қоғамдық пікірге ықпал ету мүмкіндігін бағалауға бағытталған. Рейтингті құрастыру кезінде бірқатар көрсеткіштер ескерілген. Атап айтқанда, елдің халықаралық деңгейдегі қабылдануы, мәдениет, білім және өнер салаларының тартымдылығы, саяси жүйеге деген сенім, сондай-ақ инвестициялар мен туризм үшін экономикалық тартымдылығы бағаланған. Зерттеу нәтижелері бойынша Орталық Азия елдері мынадай орындарға ие болды: 82-орын – Қазақстан (35,9 балл), 2025 жылмен салыстырғанда 5 сатыға көтерілген; 92-орын – Өзбекстан (34,5 балл), 7 сатыға жоғарылаған; 129-орын – Тәжікстан (31 балл), 12 орынға көтерілген; 138-орын – Түрікменстан (30,2 балл), 4 орынға жоғарылаған; 142-орын – Қырғызстан (29,8 балл), 4 сатыға көтерілген. Экономикалық және инвестициялық даму нәтижесінде Орталық Азия елдері халықаралық рейтингтердегі өз позицияларын біртіндеп нығайтып келеді. Дегенмен өсім әзірге шектеулі әрі өңір елдері арасында біркелкі емес. Қазақстанның өңірдегі жетекші орны оның экономикасының көлемімен де байланысты. Ел Орталық Азиядағы ең ірі экономикаға ие және өңірдің жиынтық ішкі жалпы өнімінің жартысынан астамын қалыптастырады. Сонымен қатар Қазақстан белсенді сыртқы саясат жүргізіп келеді, бұл оның халықаралық аренадағы рөлі мен ықпалын арттыруға мүмкіндік беруде. Ал әлемдік рейтингтің көшбасшылары қатарында: АҚШ – 74,9 балл, Қытай – 73,5 балл, Жапония – 70,6 балл.
Еуразия24 пікірі:
Әлемдік рейтингте 82-орынды жоғары көрсеткіш деп айту қиын. Дегенмен Орталық Азияда көш бастап тұрғаны Қазақстанның дипломатиялық, экономикалық және мәдени әлеуеті белгілі бір деңгейде қалыптасқанын көрсетеді. Қазақстанның бес сатыға жоғарылауы, біздіңше, елдің халықаралық деңгейдегі беделі мен қабылдануы біртіндеп жақсарып келе жатқанын аңғартады. Сонымен қатар Орталық Азияның басқа мемлекеттерінде де оң динамиканың байқалуы өңірдің жалпы алғанда жаһандық ақпараттық және дипломатиялық кеңістікте белсендірек көріне бастағанын білдіреді. Алайда өңір елдері мен әлемдік рейтингтің көшбасшылары арасындағы айырмашылық әлі де айтарлықтай – 80 орыннан асады. Бұл Қазақстан үшін мәдени, білім беру және гуманитарлық ықпалын халықаралық деңгейде күшейтуге әлі де үлкен мүмкіндік бар екенін көрсетеді. Ал «жұмсақ күшті» одан әрі дамыту көбіне елдің экономикалық және дипломатиялық ресурстарын тұрақты халықаралық беделге қаншалықты тиімді айналдыра алатынына байланысты болмақ.
