Құжатта әкелердің бала күтіміне байланысты демалысын еңбек өтіліне есептеу ұсынылған
Астана. 19 наурыз. ИНТЕРФАКС-ҚАЗАҚСТАН – Қазақстан парламентінің Сенаты бейсенбі күнгі жалпы отырысында екі оқылымда қарағаннан кейін еңбек жағдайларының қауіпсіздігін жетілдіру, қызметкерлердің еңбек құқықтарын қорғау және әлеуметтік қамтамасыз ету мәселелері бойынша заңнамалық актілерге өзгерістер мен толықтырулар енгізу туралы заңды мақұлдады.
Бұған дейін заң Мәжілісте қабылданған. Осылайша, құжат Парламент тарапынан толық қабылданып, мемлекет басшысының қол қоюына жолданды.
Заң жобасы депутаттар тобының бастамасымен әзірленіп, еңбек құқықтарын қорғауды күшейтуге және еңбекті қорғау жүйесінің тиімділігін арттыруға бағытталған.
Түзетулер Еңбек кодексіне және «Халық денсаулығы және денсаулық сақтау жүйесі туралы» кодекске енгізіледі.
Атап айтқанда, Еңбек кодексіне ұйым ішіндегі бір кәсіп немесе лауазым бойынша ең жоғары және ең төменгі жалақы мөлшерінің арақатынасын ұжымдық шартта айқындау, келісім комиссиясының жұмысына медиатор тарту, сондай-ақ еңбек қатынастарына тән белгілер болған жағдайда азаматтық-құқықтық шарт жасасуға тыйым салу жөніндегі нормалар енгізіледі.
Сонымен қатар әкелерге берілетін бала күтіміне байланысты демалысты еңбек өтіліне қосу қарастырылған.
Ұжымдық шарттарға еңбек қызметіне байланысты жазатайым оқиғалар кезінде төленетін жәрдемақылар мен өтемақыларды енгізу көзделеді.
Бұдан бөлек, халықты әлеуметтік қорғау саласында арнаулы әлеуметтік қызметтер көрсету қызметін лицензиялау мәселелері нақтыланады, сондай-ақ мәслихаттардың «облыстың (қаланың, ауданның) құрметті азаматы» атағын беру қағидаларын әзірлеу және бекіту жөніндегі құзыреті толықтырылады.
«Халық денсаулығы және денсаулық сақтау жүйесі туралы» кодекске өндірістік жарақаттың ауырлық дәрежесін айқындау қағидаларын бекіту жөніндегі өкілеттіктер енгізіледі.
