Астана. 19 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев елдегі ғылыми әзірлемелер нақты практикалық нәтиже беруі тиіс екенін тағы да мәлімдеді.
«Ғылым қоры инновацияларды ынталандыру бойынша жаңа функцияларға ие болды. Алайда іс жүзінде көбіне қызметті формалды түрде атқарумен шектеледі. Оның нақты жұмысына практикалық тұрғыдан қайта баға беру қажет», – деді Тоқаев бейсенбі күні Алматыда ғылыми қауымдастықпен кездесу барысында.
Президенттің айтуынша, ғылым бар болғанымен, оның нақты нәтижесі жеткіліксіз.
«Маған берілген мәліметке сәйкес, үш мыңнан астам қолданбалы ғылыми жобаның тек 193-і ғана коммерцияландыруға жарамды нәтиже көрсеткен, ал нарыққа бар-жоғы 29 жоба шыққан. Яғни индустриялық әсері өте төмен», – деді мемлекет басшысы.
Ол сондай-ақ заманауи өндірістер салу үшін бөлінген жер телімдері пайдаланылмай тұрғанын атап өтті. Сонымен қатар жұмысында елеулі олқылықтарға жол берген Ғылым қоры бөлінген мемлекеттік қаражатты қайтару мәселесін де көтермеген.
«Сырт қарағанда ештеңе болмағандай әсер қалдырады. Алайда құқық қорғау органдары грант ретінде бөлінген қаражаттың Ұлттық ғылыми-техникалық сараптама орталығы мен Ғылым қоры қызметкерлеріне аударылғанын анықтады. Қазір осы фактілер бойынша 11 қылмыстық іс тергелуде», – деді Тоқаев.
Президент барлық ғылыми әзірлемелердің қолданбалы мәнге ие болып, экономиканың нақты секторына белсенді енгізілуі қажет екенін атап өтті.
«Шындықты айту керек. Мен жағдайды әсірелеп көрсетуге үзілді-кесілді қарсымын, бірақ бос сөз бен жалған жетістіктер туралы мәлімдемелерді де қабылдамаймын», – деп түйіндеді мемлекет басшысы.
