Дубай, 24 наурыз. ИНТЕРФАКС – Пәкістан Премьер-министрі Шахбаз Шариф оның елі Таяу Шығыстағы қақтығысты реттеу мақсатында АҚШ пен Иран арасындағы келіссөздерге алаң бола алатынын растады.
«Пәкістан өңірде және одан тыс жерлерде бейбітшілік пен тұрақтылықты қамтамасыз ету мақсатында Таяу Шығыстағы соғысты тоқтатуға бағытталған диалогты жалғастыру жөніндегі күш-жігерді құптайды және толық қолдайды», – деп жазды ол сейсенбі күні Х әлеуметтік желісінде.
Премьердің айтуынша, «АҚШ пен Иран келісім берген жағдайда, Пәкістан мазмұнды әрі түпкілікті келіссөздерді өткізу үшін қабылдаушы тарап болуға дайын және оны үлкен мәртебе деп санайды».
Дүйсенбі күні Fox Business арнасына берген сұхбатында Дональд Трамп Иранмен келісім алдағы бес күн ішінде жасалуы мүмкін екенін мәлімдеген. Иран БАҚ-ының Тегеран Вашингтонмен байланыс орнатпағаны туралы хабарламаларына түсініктеме бере отырып, Трамп «олардың не туралы жазып отырғанын түсінбеймін» деген.
Кейін ол CNN арнасына берген сұхбатында Вашингтон да, Тегеран да келісімге қол жеткізуді қалайтынын айтты. Сонымен қатар, егер бес күн ішінде диалог нәтиже бермесе, АҚШ Иранға қарсы соққыларды жалғастыратынын ескертті.
Бұған дейін Исламабад жақын күндері АҚШ пен Иран өкілдері арасындағы тікелей келіссөздер өтетін ықтимал алаң ретінде қарастырылып отырғаны хабарланған еді.
