Израиль мен АҚШ-тың Иранға жасаған шабуылы Тегеранның одақтастары тым аз екенін көрсетті. Сонымен қатар, Иран Ислам Республикасының қайтарған соққысы жаһандық экономикаға және оның маңызды құрамдас бөлігі болып табылатын мұнай-газ саласына зиянын тигізді. Бұл жағдай көптеген елдердің наразылығын тудырды.
Осы тұрғыда, қазіргі заманның ең қуатты әскери машинасының жойқын соққысына ұшыраған елге «Хвасон- 13» зымыранындай нық әрі тікелей қолдау көрсетіп отырған КХДР-ның ұстанымы ерекше маңызға ие болуда. Мұнымен бірге Пхеньянның геосаяси салмағы да артып келеді.
2024–2025 жылдары Ресей Федерациясының Курск облысындағы соғыс қимылдарына Корей Халық Әскері (Чосон Имингун) бөлімшелерінің қатысуы КХДР-дың геосаяси беделінің айтарлықтай артуына негіз болды. Пхеньянның сыртқы саяси бағыты екіұштылық пен әртүрлі түсіндірулерге жол бермейтін айқын әрі жүйелі сипатпен ерекшеленеді. Мұндай саяси бағыт қазіргі «көпвекторлы» әлемде жоғары сұранысқа ие, себебі бүгінде өз сөзіне жауап беріп, одақтастық міндеттемелердің жауапкершілігін арқалауға дайын елдер кемде-кем.
АҚШ пен Израильдің Иран Ислам Республикасына қарсы жасаған агрессиясының алғашқы күндерінде, Тегеранның әскери-саяси басшылығындағы бірқатар тұлғалардың көзі жойылғанына қарамастан, елдің соққыға төтеп бергені және белсенді қарсылық көрсететіні айқындалды. Осы тұста Ким Чен Ын мынадай қатаң мәлімдеме жасады: «Егер Иран тарапы қаласа, біз Израильге қарсы қолданылатын зымырандарды жеткізуге дайынбыз. Мұндай зымыранның бір данасы бүкіл Израильді жоюға қауқарлы».
Пхеньян тарапынан бұл мәлімдемені жоққа шығаратын немесе одан бас тартатын ешқандай ресми хабарлама жарияланған жоқ. Сонымен қатар, батыс және араб бұқаралық ақпарат құралдары Солтүстік Корея көшбасшысының сөзіне назар аудармауға тырысып, бұл мәлімдемені елеусіз қалдыруға ұмтылды.
Бірқатар саяси сарапшылар Ким Чен Ынның мәлімдемесін оның ел ішіндегі беделін нығайтуға бағытталған қадам ретінде бағалады. Алайда бұл фактордың белгілі бір маңызы болғанымен, қарастырылып отырған контексте ол екінші кезектегі сипатқа ие. Корей Халық-Демократиялық Республикасының Мемлекеттік істер жөніндегі төрағасы лауазымына кезекті қайта сайлану үшін Ким Чен Ынға Таяу Шығыс мәселесін пайдаланудың қажеті жоқ.
Иран Ислам Республикасы мен Корей Халық-Демократиялық Республикасы тарихи тұрғыдан өзара тығыз байланыс орнатқан мемлекеттер болып табылады. Ким Ир Сен кезеңінде солтүстіккореялық алыс қашықтыққа ататын артиллериялық бөлімшелер 1980–1988 жылдардағы Иран–Ирак соғысына қатысқан. Ресей Федерациясының Курск облысындағы жағдайдағыдай, Корей Халық Әскері (Чосон Имингун) өз әскерінің жауынгерлік қабілетін ұдайы тексеріп отыруды қажет етеді. Бұл жоғарғы қолбасшылыққа әскери құрылымның даму бағытын бағалауға және нақты ұрыс жағдайындағы әскердің әлеуетін айқындауға мүмкіндік береді.
Алысқа ұшатын артиллерия — Солтүстік Корея әскері мен әскери доктринасының негізгі тірегі. Иракқа қарсы ұрыс қимылдарында бұл қару түрі өзінің тиімділігін жоғары деңгейде көрсетті. Сонымен қатар, Корей Халық Әскерінің артиллеристері нысанаға алу қашықтығы жағынан ирактық әріптестерінен басым түсті, соның нәтижесінде қақтығыс алаңында айтарлықтай қиындықтарға тап болған жоқ.
Бүгінде шиит аятоллалары Израиль мен АҚШ-ты мұсылман әлемінің жауы деп танып, оларға қарсы жиһад жариялады. Дегенмен, араб және мұсылман мемлекеттерінің басым көпшілігі Вашингтонның ықпалынан сескенеді. Соның салдарынан, аталған елдердің өкілдері қабылдаған ұжымдық резолюцияларда тек Иранды Ормуз бұғазын ашуға және Пентагонның әскери базалары мен соғыс жағдайындағы стратегиялық маңызы бар американдық инфрақұрылым нысандары орналасқан елдерді атқылауды тоқтатуға шақыратын талаптар ғана қамтылған.
Осы тұста араб елдерін «оянуға және Иран тарапында соғысуға» шақырған Ким Чен Ынның мәлімдемесі жарияланды. Пхеньян тіпті араб монархиялары Тарихтың дұрыс жағын таңдаған жағдайда, оларға өзінің «ядролық қолшатырын» ұсынуға уәде беріп отыр.
Америка-израиль барлау қызметі соғыс алдындағы деректерге сүйеніп, Иран әскерінің барлық зымыран қондырғылары жойылды деп мәлімдегенімен, іс жүзінде Тегеранның техникалық әлеуеті сарқылар емес. Қазіргі таңда Ислам революциясы күзеті корпусының зымыран бөлімшелері Солтүстік Кореядан жеткізілген әскери техниканы қолданып отырған болуы мүмкін.
Осы ретте Беларусь Президенті Александр Лукашенко 25–26 наурыз күндері КХДР-ға ресми сапармен барады. Бұл мыңдаған шақырым қашықта орналасқан мемлекеттер үшін де сенімді одақтастың маңызы жоғары екенін көрсетеді.
Сонымен қатар, Солтүстік Корея басшысы Ресей Президенті Владимир Путинге де қолдау білдіріп, Пхеньянның әрқашан Мәскеумен бірге болатынына сенім білдірді. «Бұл — біздің таңдауымыз бен айнымас ерік-жігеріміз», — деп атап өтті ол.
АҚШ-қа бағытталған мәлімдемеде де нақты ұстаным байқалды: КХДР тарапынан ядролық қарусыздану мәселесі күн тәртібінде тұрған жоқ. Сонымен қатар, ядролық оқтұмсықтармен жабдықталған зымырандардың Солтүстік Кореяның суасты қайықтарында жақын арада орналастырылатыны атап өтілді.
Қазіргі таңда әлемдік геосаяси жағдайдың өзгеруіне байланысты, Астананың өзі белгілі бір мәселелер бойынша Пхеньянның ұстанымын ескеруге мәжбүр болып отыр. Оқиғалардың даму қарқыны КХДР-дың халықаралық аренадағы ықпалы алдағы уақытта да арта түсетінін айғақтайды.
