Астана, 27 наурыз. ИНТЕРФАКС-ҚАЗАҚСТАН – Қазақстан Парламенті (Мәжіліс пен Сенат) жұма күні өткен бірлескен отырыста «Алатау қаласының арнайы құқықтық режимі туралы» конституциялық заңды екінші оқылымда қарап, қабылдады.
Бұған дейін құжат «Алатау қаласының арнайы мәртебесі туралы» деп аталған. Мәжіліс депутаты Нұртай Сабильяновтың айтуынша, екінші оқылымға дайындық барысында екі палатаның бірлескен комиссиясы заң атауын өзгерту туралы шешім қабылдаған.
Заңның негізгі мақсаты – Алатау қаласының жедел әрі тұрақты дамуына қолайлы жағдай жасау.
Құжатқа сәйкес, Алатау жобасы дербес экожүйе ретінде қарастырылады. Ол жеке қаржылық модельге, арнайы басқару режиміне және жаңа институционалдық негізге сүйенеді.
Заңда Alatau City Authority атты жаңа орган құру көзделген. Оның қызметі Премьер-министр төрағалық ететін кеңес арқылы айқындалады.
Құжатта инвестициялық келісімдердің тұрақтылығы, арнайы құқықтық режимнің басымдығы және лицензиялаудың ерекше тәртібі бекітілген. Сонымен қатар «бір терезе» қағидаты бойынша тәуелсіз реттеу жүйесі енгізіледі.
Инвесторлардың құқықтары халықаралық деңгейде қорғалатын болады. Олар Астана халықаралық қаржы орталығына немесе халықаралық арбитражға жүгіну мүмкіндігіне ие болады.
Салықтық жеңілдіктер тек қаланың басым даму салаларына сәйкес келетін жаңа инвестициялық жобаларға ғана беріледі. Инвесторларға қатысты барлық жеңілдіктер мен міндеттемелер ашық түрде жарияланады.
Alatau City Authority республикалық бюджеттік бағдарламалардың дербес әкімшісі болады. Оның бюджеті республикалық бюджет құрамында блоктық қағидатпен қалыптастырылып, негізінен инфрақұрылымды дамыту мен ұзақ мерзімді жобаларды қолдауға бағытталады. Ал қаланың жергілікті бюджеті ағымдағы және әлеуметтік міндеттемелерді орындауға жұмсалады. Бюджеттік дербестікке қол жеткізілгенге дейін Алатау қаласының қаражатын өзге бюджеттерге алу көзделмейді.
Заң сондай-ақ Алатауды Smart City үлгісі бойынша дамытуға бағытталған. Цифрлық платформа арқылы тұрғындарға негізгі қызметтер, оның ішінде рұқсат беру рәсімдері мен арнайы құқықтық режим аясындағы қызметтер ұсынылады. Сонымен қатар цифрлық активтердің айналымын, оның ішінде криптобиржалар мен токенизацияны реттеу мүмкіндігі қарастырылған.
Заң Президенттің қол қоюына жолданды.
Алатау қаласы Алматы облысында 2024 жылғы қаңтарда Мемлекет басшысының жарлығымен құрылған. Қаланың бас жоспары сингапурлық Surbana Jurong компаниясымен бірлесіп әзірленген. 2025 жылғы қыркүйекте Президент Алатауға арнайы мәртебе беру туралы жарлыққа қол қойған. Жоспарға сәйкес, «Алатау Сити» өңірдегі толық цифрлық форматта жұмыс істейтін алғашқы қалаға айналмақ.
