Вашингтон, 30 наурыз. ИНТЕРФАКС – Наурыз айында Ормуз бұғазынан өткен танкерлердің шамамен 80%-ы Иранға немесе онымен тығыз байланыстағы елдерге тиесілі болған. Бұл туралы Bloomberg мониторингтік деректерге сілтеме жасап хабарлады.
Агенттік мәліметінше, осы кезеңде бұғаз арқылы өткен аз ғана танкердің басым бөлігі Иран немесе оған жақын мемлекеттердің кемелері болған.
Сарапшылардың деректеріне сәйкес, наурыз айында бұғаз арқылы тәулігіне екі бағытта орта есеппен алты кеме өткен. Ал Таяу Шығыстағы қақтығысқа дейін бұл көрсеткіш шамамен күніне 135 кемені құраған. Сонымен қатар аймақта радиоэлектрондық күрес құралдарының қолданылуына байланысты навигациялық деректерді беру жүйелері іркіліспен жұмыс істеген, ал кейбір кемелердің экипаждары транспондерлерін әдейі өшірген.
Наурыз айында бұғаздан өткен 110 кеменің 36%-ы Иранға қатысты санкцияланған немесе «көлеңкелі флотқа» жататын кемелер болған. Kpler компаниясының 26 наурыздағы дерегіне сәйкес, Иран тәулігіне шамамен 1,8 млн баррель мұнай экспорттаған, бұл 2025 жылмен салыстырғанда 8%-ға жоғары. Ал Ирактың экспорты 80%-ға, Сауд Арабиясының экспорты 25%-дан астам төмендеген.
Сонымен қатар Иранда Ормуз бұғазы арқылы өтетін кемелерден алым алуға мүмкіндік беретін заң жобасы дайындалып жатқаны атап өтіледі. Іс жүзінде мұндай тәжірибе қазірдің өзінде қолданылып келеді: Тегеран делдалдар арқылы экипаж құрамы мен жүк туралы мәлімет сұратып, кей жағдайларда төлем талап етеді.
Айта кетейік, БҰҰ-ның теңіз құқығы жөніндегі конвенциясы Ормуз бұғазы сияқты стратегиялық маңызы бар теңіз жолдары арқылы еркін өтуді қарастырады. Алайда бұл құжатты Иран да, АҚШ та ратификацияламаған.
