Астана. 6 сәуір. Интерфакс-Қазақстан – Қазақстан Президенті Қасым-Жомарт Тоқаев Қаржылық мониторинг агенттігі (ҚМА) төрағасы Жанат Элимановтың ағымдағы қызметі мен алдағы кезеңге арналған міндеттері туралы есебін тыңдады, деп хабарлайды мемлекет басшысының баспасөз қызметі.
Ж. Элимановтың мәліметінше, бюджет шығыстарын мониторингтеу барысында мал шаруашылығы саласында бөлінген субсидияларды тиімсіз пайдалану тәуекелдері 30 млрд теңгеге бағаланған.
Сонымен қатар ғылыми зерттеулер мен ғылыми-техникалық қызмет нәтижелерін коммерцияландыруға бөлінген 10 млрд теңгеден астам грант қаражатының ысырап болу белгілері анықталған.
Міндетті әлеуметтік медициналық сақтандыру (МӘМС) қаражатын жымқыру фактілері бойынша 14 сотқа дейінгі тергеп-тексеру басталды.
Бұдан бөлек, құрылыс саласында 5,3 млрд теңгені жымқыру белгілері бойынша 21 қылмыстық іс тергеліп жатыр. Сондай-ақ бірінші санаттағы лицензияларды заңсыз алу фактілері тоқтатылып, 400-ден астам жалған құрылыс компаниясының құқықтары шектелді.
Алаяқтыққа қарсы іс-қимыл шеңберінде 17 қаржы пирамидасының қызметі тоқтатылды. Банктер мен байланыс операторлары атынан арнайы жабдық арқылы жаппай фишингтік SMS-хабарламалар таратқан топ әшкереленді.
3,7 мың алаяқтық сайт пен 25 мыңнан астам аудиториясы бар 22 топтық чат жабылды.
Сонымен қатар дроп-карталарды заңсыз схемаларда пайдалану фактілері бойынша 14 сотқа дейінгі тергеп-тексеру басталып, олардың жалпы айналымы 13 млрд теңгеден асқаны анықталды. Жалған тұлғаларға рәсімделген 68 мыңнан астам карта бұғатталды.
«Жалған компаниялар мен құжаттарды пайдалану фактілері бойынша, соның салдарынан шамамен 13 млрд теңге залал келтірілген, 23 сотқа дейінгі тергеп-тексеру басталды. Қаржы пирамидалары, онлайн-казино және алаяқтықтан түскен кірістерді заңдастырған 3 көлеңкелі криптоайырбастау қызметінің жолы кесілді. Криптовалюталарды заңсыз айырбастауға арналған 483 сілтемеге қолжетімділік шектелді», – делінген хабарламада.
Кездесу қорытындысы бойынша Қ. Тоқаев агенттік қызметінің негізгі бағыттары бойынша бірқатар тапсырма берді.
6 сәуірдегі ресми бағам – 1 АҚШ доллары үшін 470,46 теңге.
