Астана. 7 сәуір. Интерфакс-Қазақстан — Ауыл шаруашылығы министрлігі Жер кодексіне келесі жылдан бастап ауыл шаруашылығы мақсатындағы жерлерді бөлу процесін толықтай цифрлық форматқа — электронды конкурстарға көшіруді қарастыратын түзетулер енгізуді ұсынып отыр.
«Түзетулердің негізгі мақсаты — жер комиссияларының функциясын жою және электронды форматқа толық көшу арқылы ауыл шаруашылығы жерлерін бөлудің ашықтығын қамтамасыз ету», — деді Ауыл шаруашылығы вице-министрі Азат Сұлтанов Мәжілістің топырақты қорғау мәселелері бойынша заңнамалық актілерге енгізілетін түзетулерді қарау жөніндегі жұмыс тобының отырысында.
Ол Жер кодексінің бірқатар баптарын жер беру тетігін электронды конкурстар негізінде цифрлық форматқа ауыстыру тұрғысынан жаңа редакцияда ұсыну көзделгенін атап өтті.
Сұлтановтың айтуынша, түзетулер жерді бөлу жөніндегі конкурсты мемлекеттік мүлік тізілімі веб-порталында өткізуді қарастырады. Бұл ретте өтінім беруден бастап жеңімпазды анықтауға дейінгі барлық процедуралар толық автоматтандырылады.
«Жергілікті атқарушы органның шешім қабылдауын, жалдау шартына қол қоюды, сондай-ақ жер учаскесіне сәйкестендіру құжатын беруді қамтитын бүкіл процесс электронды түрде жүзеге асырылады», — деп түсіндірді А. Сұлтанов.
Жаңа ережелер конкурсты өткізу мерзімін екі есеге — 90 күннен 45 күнтізбелік күнге дейін қысқартуға мүмкіндік береді.
Вице-министрдің пікірінше, электронды конкурстарды енгізу агроөнеркәсіптік кешен субъектілері үшін жер ресурстарына жедел әрі тең қолжетімділікті қамтамасыз етеді және мемлекеттік аппаратқа түсетін әкімшілік жүктемені айтарлықтай азайтады.
Парламент тарапынан мақұлданған жағдайда, жаңа нормалар 2027 жылғы 1 қаңтардан бастап қолданысқа енгізіледі.
