Еуразиялық экономикалық комиссия хабарлайды: Еуразиялық экономикалық комиссия Алқасы Еуразиялық экономикалық одақтың кедендік аумағына есірткі құралдарын, психотроптық заттарды және олардың прекурсорларын әкелу және (немесе) әкету кезінде рұқсат беру тәртібіне жататын тізбені жаңартты. «ЕЭК бұл шешімді ЕАЭО-ға мүше мемлекеттердің үш халықаралық конвенцияға қатысатындығын ескере отырып қабылдады. Бұл құжаттар халықтың денсаулығы мен әл-ауқатын қорғау мақсатына қол жеткізуге бағытталған. Атап айтқанда, 1972 жылғы хаттамаға сәйкес өзгерістер енгізілген 1961 жылғы Есірткі құралдары туралы бірыңғай конвенция; 1971 жылғы Психотроптық заттар туралы конвенция және 1988 жылғы БҰҰ-ның есірткі құралдары мен психотроптық заттардың заңсыз айналымына қарсы күрес туралы конвенциясы», – деді ЕЭК-тің кедендік-тарифтік және тарифтік емес реттеу департаментінің директоры Ваагн Казарян. Есірткі құралдары жөніндегі комиссия қабылдаған шешімдердің қорытындысы бойынша, ЕАЭО аясында реттелетін есірткі және психотроптық заттар тізіміне халықаралық деңгейде бақылауға алынған бірқатар заттар енгізілді. Шешім ресми жарияланған күннен бастап 30 күнтізбелік күн өткен соң күшіне енеді.
Еуразия24 пікірі:
Өкінішке қарай, сөз болып отырған есірткі және психотроптық заттардың толық тізімі жарияланбаған. Алайда ЕЭК алқасының шешімі халықаралық құжаттарға сүйенетінін ескерсек, «еуразиялық кеңістікте» де сол мақсат-міндеттерге сәйкестік көзделгені байқалады. Сондықтан БҰҰ Есірткі құралдары жөніндегі комиссиясы 2023–2025 жылдары қабылдаған соңғы шешімдерге қарасақ, әңгіме бірқатар жаңа буын заттар туралы болуы мүмкін. Мысалы: синтетикалық опиоидтар – нитазендер және фентанилдің жаңа аналогтары. Бұлар аса күшті әсер ететін, жиі артық дозалану жағдайларына әкелетін қауіпті заттар. Синтетикалық каннабиноидтар – жаңа «спайс» түрлері және THC (тетрагидроканнабинол) зертханалық аналогтары. Жаңа психостимуляторлар – «тұздарға» ұқсас заттар және амфетамин туындылары. Жаңа буын есірткілерінің көпшілігі бұрын белгісіз болған реагенттердің негізінде жасалады. Бұл заттар ұзақ уақыт бойы көптеген елдерде тыйым салынбағандықтан, заңды түрде әкелініп, кейіннен заңсыз өнім өндіруге пайдаланылған. Тек кейінгі жылдары ғана олар халықаралық ұйымдардың, соның ішінде БҰҰ-ның назарында бақылауға алына бастады. Осы тұрғыда, есірткі айналымына қатысты халықаралық шешімдерге дер кезінде жауап беру – ЕАЭО елдері аумағында мұндай заттардың өндірісін де, таралуын да алдын алудың тиімді жолы болып саналады.
