Астана. 11 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев сенбі күні жұмыс сапарымен Бұхара қаласына барды. Бұл туралы Мемлекет басшысының баспасөз қызметі хабарлады.
Әуежайда Қасым-Жомарт Тоқаевты Өзбекстан Президенті Шавкат Мирзиёев қарсы алды. Қазақстандық мәртебелі мейманның құрметіне ұлттық әндер мен билер орындалды.
Баспасөз қызметінің мәліметінше, мемлекеттер басшылары бейресми жағдайда пікір алмасып, қаланың бірқатар тарихи және өнеркәсіп нысандарын аралайды деп жоспарлануда.
Бұған дейін хабарланғандай, Қасым-Жомарт Тоқаев пен Шавкат Мирзиёев бейресми кездесу барысында екі ел арасындағы стратегиялық серіктестік пен одақтастықты нығайту перспективаларын, сондай-ақ өңірлік күн тәртібіндегі өзекті мәселелерді талқылайды.
