Астана. 14 сәуір. ИНТЕРФАКС-ҚАЗАҚСТАН – Қазақстанның Энергетика министрлігі ірі жер қойнауын пайдаланушылармен мұнай өндіру көлемін ұлғайту мәселесі бойынша келіссөздер жүргізуде. Бұл туралы ведомство басшысы Ерлан Аккенженов мәлімдеді.
«Мұнай өндіруді арттыруға бағытталған шаралар бойынша ірі жер қойнауын пайдаланушылармен келіссөздер жүргізілуде», – деді Ақкенженов сейсенбі күні Астанада өткен Үкімет отырысында.
Министрдің айтуынша, өндіру көлемін арттыру мақсатында Қарашығанақ кен орнында шикі газды кері айдауға арналған алтыншы компрессорды іске қосу жұмыстары жалғасып жатыр. Бұл жоба мұнай өндіру деңгейін жылына 10–11 млн тонна көлемінде ұстап тұруға мүмкіндік береді.
Бұған дейін министр 2026 жылдың I тоқсанында Қазақстанда мұнай және газ конденсатын өндіру көлемі өткен жылдың сәйкес кезеңімен салыстырғанда 20%-ға төмендеп, 24,6 млн тоннадан 19,7 млн тоннаға дейін азайғанын хабарлаған болатын.
Оның мәліметінше, мұнай-газ саласындағы көрсеткіштердің төмендеуі КТК мен Теңіздегі жағдайға байланысты.
Қаңтар айында Теңіз кен орнында трансформаторлар жанғандықтан, 19 қаңтарда мұнай өндіру тоқтатылған. Өндіру жұмыстары 31 қаңтарда қайта жанданды. 11 наурызда Ерлан Ақкенженов Теңіздегі өндіріс көлемі қалпына келтіріліп, тәулігіне 120 мың тонна деңгейіне жеткенін мәлімдеді.
Каспий құбыр консорциумы (КТК) Қазақстанның батысындағы және Каспий қайраңындағы ресейлік кен орындарын Қара теңіздегі Новороссийск портындағы теңіз терминалымен байланыстырады. Құбыр желісінің ұзындығы шамамен 1,5 мың шақырымды құрайды. Бұл – қазақстандық мұнайды экспорттаудың негізгі бағыты, оның үлесіне елден тасымалданатын мұнайдың 80%-дан астамы тиесілі. КТК Қазақстан аумағынан жылына шамамен 72,5 млн тонна, ал Ресей арқылы 83 млн тоннаға дейін мұнай тасымалдауға қауқарлы. Соңғы айларда КТК нысандарында ауа райының қолайсыздығы мен инфрақұрылымға жасалған ұшқышсыз ұшу аппараттарының шабуылдарына байланысты бірнеше рет оқыс жағдайлар тіркелген.
