Астана. 14 сәуір. ИНТЕРФАКС-ҚАЗАҚСТАН – Қазақстанда 2026 жылдың I тоқсанында мұнай өндіру көлемінің төмендеуі жыл ішінде өтеледі. Бұл туралы Қаржы вице-министрі Ержан Біржанов мәлімдеді.
«Жыл басында жоғалтқан мұнай өндіру көлемін жыл соңына дейін толық өтейміз», – деді Біржанов сейсенбі күні Астанада өткен Үкіметтегі брифингте.
Вице-министрдің айтуынша, бірінші тоқсан қорытындысы бойынша бюджет түсімдеріне мұнай өндіру және экспорт көлемі әсер еткен.
«Жыл басында өндіру мен экспорт бойынша іркілістер болды. Уәкілетті орган оны растады, сонымен қатар айлақты қалпына келтіру бойынша қосымша жұмыстар жүргізілді. Жыл басында түспеген салықтар жыл ішінде өтелуі тиіс», – деді ол.
Бұған дейін Энергетика министрі Ерлан Аккенженов 2026 жылдың I тоқсанында Қазақстанда мұнай және газ конденсатын өндіру көлемі өткен жылдың сәйкес кезеңімен салыстырғанда 20%-ға төмендеп, 24,6 млн тоннадан 19,7 млн тоннаға дейін азайғанын хабарлаған болатын.
Министрдің мәліметінше, бұл төмендеу КТК мен Теңіздегі жағдайға байланысты.
Еске салайық, 2026 жылға арналған әлеуметтік-экономикалық даму жоспарына сәйкес, жыл қорытындысы бойынша мұнай өндіру көлемі 100,5 млн тонна деңгейінде жоспарланған. Алайда Ерлан Ақкенженов КТК мен Теңіздегі жағдайға байланысты нақты көрсеткіш 96–98 млн тонна шамасында болуы мүмкін екенін айтқан.
Қаңтар айында Теңіз кен орнында трансформаторлар өртеніп, 19 қаңтарда мұнай өндіру тоқтатылған. Өндіру 31 қаңтарда қайта жанданды. 11 наурызда министр өндіріс тәулігіне 120 мың тонна деңгейінде қалпына келтірілгенін мәлімдеді.
Жыл басында Каспий құбыр консорциумы (КТК) арқылы мұнай жеткізу ұшқышсыз ұшу аппараттарының шабуылдарына байланысты шектелген болатын. Бұл жүйе Қазақстан мұнайын экспорттаудың негізгі бағыты болып саналады және құбыр арқылы тасымалданатын мұнайдың 80%-дан астамы осы бағытқа тиесілі.
