***Тұрақтандыру қорлары ӘКК құрамынан шығарылады
Астана. 14 сәуір. ИНТЕРФАКС-ҚАЗАҚСТАН – Қазақстанда әлеуметтік-кәсіпкерлік корпорацияларды (ӘКК) реформалау жоспарланып отыр. Оларды қайта құру мәселелері Үкіметтегі кеңесте қаралды, деп хабарлады Премьер-министрдің баспасөз қызметі.
Хабарламаға сәйкес, Ұлттық экономика министрлігі ӘКК үшін жеті негізгі функцияны айқындаған.
Корпорациялар инвесторлар мен кредиторларды айқындай отырып, өңірлік жобалардың бес жылдық портфельдерін қалыптастыруы тиіс. Қаржыландыру көздері ретінде банктер мен «Бәйтерек» тобының даму институттары қарастырылуда.
ӘКК бизнес пен ұлттық даму институттары – «Даму» қоры, Өнеркәсіпті дамыту қоры, Қазақстанның Даму банкі, Аграрлық несие корпорациясы, сондай-ақ Kazakh Invest, QazIndustry, QazTrade агенттіктері арасында байланыстырушы буын қызметін атқарады.
Сонымен қатар ӘКК-ларға табыстылық және өзін-өзі ақтау қағидаттары негізінде кредит беру құқығы беріледі. Баспасөз хабарламасында мемлекеттік активтерді басқару кіріс әкелуге бағытталуы тиіс екені атап өтілген.
Реформа аясында тұрақтандыру қорларын (әлеуметтік маңызы бар азық-түлік тауарлары бағасын тежеуге арналған мемлекеттік резервтер) ӘКК құрамынан шығару қарастырылуда. Бұл шығын әкелетін функцияларды қысқартуға, ашықтықты арттыруға және кредиттік рейтингтер алуға, сондай-ақ нарықтық қаржыландыру тартуға мүмкіндік береді.
Кеңес қорытындысы бойынша вице-премьер Қанат Бозымбаев арнайы экономикалық және индустриялық аймақтардың қызметіне қатысты мәселелерді пысықтауды, бейінді емес активтерге түгендеу жүргізуді, сондай-ақ ӘКК үшін бірыңғай кредиттік және инвестициялық саясатты қалыптастыруға арналған нормативтік базаны әзірлеуді тапсырды.
