Астана. 16 сәуір. ИНТЕРФАКС-ҚАЗАҚСТАН – Президенттің АҚШ-пен өзара іс-қимыл жөніндегі арнайы өкілі Ержан Қазыхан бастаған қазақстандық делегация АҚШ-қа сапары аясында АҚШ Мемлекеттік хатшысы Марко Рубиомен кездесті. Бұл туралы ҚР Сыртқы істер министрлігінің баспасөз қызметі хабарлады.
Кездесуге Қазақстан Премьер-министрінің орынбасары Серік Жұманғарин да қатысты.
Кездесу барысында Қазыхан Қазақстан Президенті Қасым-Жомарт Тоқаевтың АҚШ Президенті Дональд Трампқа жолдаған сәлемін жеткізіп, екі ел арасындағы қатынастардың серпінді дамып келе жатқанын, саяси диалогтың тұрақты екенін және практикалық ынтымақтастықтың кеңейіп отырғанын атап өтті.
Хабарламада 2025 жылдың қарашасында Ақ үйдегі кездесу қорытындысы бойынша қол жеткізілген уағдаластықтарды іске асыруға ерекше назар аударылғаны айтылған. Оның ішінде шамамен 20 млрд долларды құрайтын бірлескен инвестициялық жобалар бар.
Тараптар сауда-экономикалық және инвестициялық ынтымақтастықты одан әрі кеңейтуге өзара мүдделілік танытатынын растады. Іскерлік байланыстарды жандандыру мен бірлескен жобаларды іске асыру кеңейтілген стратегиялық әріптестікті тереңдетуге жаңа мүмкіндіктер ашатыны атап өтілді.
Қазыхан АҚШ мемлекеттік хатшысын Қазақстанға ресми сапармен келуге шақыруды растады. Өз кезегінде Рубио екіжақты өзара іс-қимылдың қазіргі деңгейіне жоғары баға беріп, оны одан әрі дамытуға дайын екенін білдірді.
Кездесу қорытындысы бойынша тараптар диалогты жалғастырып, екіжақты ынтымақтастықты барлық бағыт бойынша нығайтуға келісті.
