ҚР Мәдениет және ақпарат министрлігі хабарлайды: «2023 жылғы «Дәстүрлерді жаңғырту: қоғамдағы жаңа мінез-құлық нормалары» атты талдау есебіне сәйкес, қазақстандықтардың 46,8%-ы кітап оқуды ұнататынын айтқан. Алайда, шын мәнінде халықтың тек 19%-ға жуығы ғана жылына 4 кітаптан артық оқиды. Оқуға қызығушылық табыс деңгейі мен білім дәрежесіне тікелей байланысты: бұл көрсеткіштер жоғарылаған сайын оқу жиілігі де артады. Сонымен қатар жастардың оқу белсенділігі 60 жастан асқан буынмен шамалас екені байқалады, ал ең төмен көрсеткіш 29–45 жас аралығындағы топта тіркелген. Өңірлік айырмашылықтар да бар — бірқатар облыстарда оқитындардың үлесі айтарлықтай төмен. Аталған деректер қоғамда оқуға қызығушылық бар екенін, алайда оның тұрақты дағдыға толық айналмай отырғанын көрсетеді».
Еуразия24 пікірі:
Мұндай үрдістердің себебі неде? Біздіңше, мұндағы негізгі фактор «кітапты сүю-сүймеуде» емес, әлеуметтік жағдайда жатыр. Егер халықтың жартысына жуығы «оқығанды ұнатамын» деп тұрып, іс жүзінде аз оқыса, бұл — қоғамда кітап оқудың әлі де биік құндылық ретінде дәріптелетінінің белгісі. Алайда күнделікті тіршілікте оған не уақыт, не ресурс қалмайды. Ал «табыс жоғары болған сайын, кітап оқу жиілейді» деген заңдылық әбден күтілген жайт. Кітап, тіпті цифрлық нұсқада болса да, тек оның бағасына ғана тіреліп тұрған жоқ. Бұл — бос уақыттың болуы және ұзақ мәтіндерді қабылдау дағдысының қалыптасуы. 29-45 жас аралығындағы топтың кітап оқудан «қалып қоюы» — ең айқын көрсеткіш. Себебі бұл буын өмірдің ең белсенді әрі ауыр кезеңін бастан кешіп отыр: отбасы, жұмыс, несие дегендей. Мұндай қыспақта көлемді дүниелерді оқу әрқашан әлеуметтік желі немесе жаңалықтар лентасы сияқты қысқа контентке жол береді. Қазіргі жас отбасылардың көбінде үй кітапханасы мүлдем жоқ, өйткені оны жинауға себеп те, қаражат та жетіспейді.
