Астана. 21 сәуір. ИНТЕРФАКС-ҚАЗАҚСТАН – Астана мен Ұлан-Батыр арасындағы әуе қатынасы жақын уақытта қайта іске қосылады. Сонымен қатар Өскемен – Өлгий бағытында жаңа әуе рейсі ашылады. Бұл туралы Қазақстан Президенті Қасым-Жомарт Тоқаев мәлімдеді.
«Біздің елдеріміз арасындағы әуе қатынасын қалпына келтіру – басым міндеттердің бірі болып қала береді. Қазіргі уақытта Алматы – Ұлан-Батыр бағыты бойынша тұрақты рейстер орындалуда. Жақын уақытта Астана мен Ұлан-Батыр арасындағы жолаушылар тасымалын қайта бастау жоспарланып отыр», – деді Тоқаев Астанада Моңғолия Президентімен келіссөздер қорытындысы бойынша БАҚ өкілдеріне жасаған мәлімдемесінде.
«Сонымен қатар келіссөздер аясында Өскемен – Өлгий бағыты бойынша әуе қатынасын ұйымдастыру жөнінде келісімге қол қойдық», – деп хабарлады Қазақстан Президенті.
«Бұл маңызды қадам екіжақты әріптестікті жаңа деңгейге көтеріп, өңіраралық байланыстарды нығайтуға кең мүмкіндік ашады», – деп түйіндеді Тоқаев.
