Бір қарағанда тосын көрінгенімен, Украинадағы соғыста жеңілген тарап Ресей деген тұжырым жасалып отыр. Мұндай тұжырымды өмір жолы сан қилы оқиғаларға толы, ақырында Ресейде «шетелдік агент» деп танылған саясаттанушы Александр Морозов жасады.
Саясаттанушы бұл пікірін Украина мен әлемдегі басты жаңалықтарды жариялайтын «Только что» YouTube арнасында айтқан. Жазылушылары көп, көрермені де ауқымды осы арна арқылы «жалпы алғанда, Украина соғыста жеңіске жетіп қойды» деген тұжырым көпшілікке тарады. Алайда арна көрермендері үшін мұндай мәлімдеме жаңалық емес. Өйткені осы сарындағы пікірлер бейнежазбаларда үнемі қайталанып отырады.Әрине, мәселені барынша кең ауқымда қарастырып, нақты өлшемдерге сүйенбесек, кез келген оқиғаны жеңіс деп те, жеңіліс деп те бағалауға болады. Олай болса, «Еуразия24» басылымының дәл осы материалға назар аударуының себебі неде?
Бұған бірнеше себеп бар.
Біріншіден, саясаттанушының кәсіби жолы қызығушылық тудырды. Александр Морозов Мәскеу мемлекеттік университетінің журналистика факультетіне оқуға түскен, алайда оны аяқтамай, кейін философия факультетіне түскен. Әр жылдары «Комсомольская правда», «Учительская газета» және «Пионерская правда» газеттерінде қызмет атқарған.
Кейін жұмыс істемегені үшін қамауға алынған. Одан соң Мәскеу физика-техникалық институты жанындағы астыртын журналды шығаруға атсалысып, Латвия газетінің Мәскеудегі тілшілер қосынында қызмет еткен. Кейін Мемлекеттік Думаның газетінде редактор, Орыс православие шіркеуінің ресми басылымы – «Церковный вестник» газетінде жауапты хатшы болған.
Ресейдің Өмір партиясы мен «Әділетті Ресей» партиясының аппаратында жұмыс істеп, «Русский журнал» басылымының бас редакторы қызметін атқарған. Мәскеуде блогерлер клубын ұйымдастырып, Германиядағы Рур университеті мен Прагадағы Карл университетінде дәріс берген. Қазір Чехияда тұрады. Бір сөзбен айтқанда, алдына қойған мақсатына табандылықпен ұмтылған адам.
Алайда бұл жолы назар аударатын басты мәселе басқа. Морозовтың пікірінен Украинадағы соғыстың, Ирандағы қақтығыстың және барған сайын тұрақсызданып бара жатқан әлемдегі өзге де оқиғалардың себептерін түсіндіруге қатысты бұрыннан айтылып жүрген көзқарас тағы да анық байқалады. Оның үстіне, бұл жолы аталған тұжырым еш күмән келтірмейтіндей, түпкілікті ақиқат ретінде ұсынылған.
Мұндай сенім тек журналист әрі философ Морозовқа немесе «Только что» арнасына ғана тән емес. Бұл – тұтас Батысқа тән көзқарас.
Барлық мәселенің түп-төркіні екі диктаторға келіп тіреледі: Трамптың бар ойы – бейберекеттік орнату, ал Путиннің бар назары – Украинада.
Бар болғаны осы. Егер осы екі тұлға болмаса, әлемде қайтадан тыныштық орнап, тұрақтылық пен әл-ауқат қалпына келеді деген түсінік қалыптасқан. Әрине, мұндай көзқарасты ұстануға да, соған сеніп, көңіл жұбатуға да болады. Алайда АҚШ пен Батыстың үстемдігіне негізделген әлемдік тәртіп ыдырап жатқан қазіргі кезеңде осындай қарапайым түсініктің зардабын кім көбірек тартады? Тұтас әлем бе, әлде осы көзқарасты ұстанатындардың өздері ме?
Біздің елімізде де медиа, бизнес және саяси ортада экономиканың шикізат пен өзге де өнімдерді сыртқа шығаруға негізделген салаларымен байланысы бар белгілі бір топтар кездеседі. Олар да болып жатқан өзгерістердің себебін Трамп пен Путиннің жеке басынан іздеп, осы түсінікпен өздерін жұбатуға бейім.
Ал Қазақстан үшін ең маңыздысы – алдағы өзгерістерді шынайы бағалап, болашаққа байыппен қарау. «Еуразия24» басылымы да осыған ықпал етуді мақсат етеді. Соның бір жолы – оқырманға «Арғы тараптың көзқарасы» айдарымен осындай материалдарды ұсыну.
