Брюссель. 11 мамыр. ИНТЕРФАКС – Еуроодақ Украинаға 2026-2027 жылдарға арналған 90 млрд еуро көлеміндегі несиенің шамамен 9 млрд еуро болатын алғашқы бөлігін жақын арада төлеуге дайын. Бұл туралы Еурокомиссияның (ЕК) ресми өкілі Балаш Уйвари мәлімдеді.
«Маусым айынан кешіктірмей, яғни екінші тоқсанның соңына дейін шамамен 9 млрд еуро төленеді. Қаражат былайша бөлінеді: 5,9 млрд еуро – қорғаныс саласына, 3,2 млрд еуро – макроқаржылық көмек бағдарламасына бағытталады», — деді Уйвари Брюссельде өткен брифингте.
Ол қорғаныс қажеттіліктеріне арналған алғашқы төлемнің дрон (ұшқышсыз ұшу аппараттары) сатып алуға жұмсалатынын, сондай-ақ болашақта басқа да қару-жарақ түрлерін сатып алу бойынша келіссөздер жүріп жатқанын атап өтті.
Ресми өкілдің айтуынша, Украинаға берілетін бұл қарызды жүзеге асыру дайындығы сәтті жүріп жатыр, тек бірнеше техникалық кезең қалды. «Ең алдымен, макроқаржылық көмек бағдарламасының негізі болып табылатын өзара түсіністік туралы меморандум бойынша айтарлықтай ілгерілеушілік бар, талқылаулар жуырда аяқталуы тиіс. Украина қорына қатысты украиналық әріптестерімізбен келіссөздер жалғасуда. Соңғы кезең – кез келген төлем жасалғанға дейін қол қойылуы тиіс несиелік келісім», — деп түсіндірді Уйвари.
Сондай-ақ ол қаражатты мүмкіндігінше тезірек аудару көзделіп отырғанын жеткізді. «Бұған дейін айтқанымыздай, біз алғашқы траншты екінші тоқсанда төлеуге ниеттіміз және бұл міндет орындалады», — деді Еурокомиссия өкілі.
