Астана. 12 мамыр. ИНТЕРФАКС-ҚАЗАҚСТАН — Қазақстанның Ауыл шаруашылығы министрлігі биыл ауыл шаруашылығы техникасы паркін жаңарту деңгейін 6,5%-дан 8%-ға дейін көтеруді көздеп отыр. Бұл туралы ауыл шаруашылығы вице-министрі Азат Сұлтанов мәлімдеді.
«Мемлекеттік қолдау шараларының арқасында 2025 жылдың қорытындысы бойынша ауыл шаруашылығы техникасының жаңарту деңгейі 6,5%-ға жетті. Биылғы меже — 8%», — деді Сұлтанов сейсенбі күні өткен Үкімет отырысында.
Ол биыл ауыл шаруашылығы техникасын өндіру көлемін 6%-ға арттырып, 9,9 мың бірлікке жеткізу жоспарланғанын атап өтті.
Вице-министрдің мәліметінше, қазіргі уақытта ауыл шаруашылығы құрылымдарында 133,9 мың трактор, 5,6 мың жоғары өнімді егіс кешені, 71,4 мың дән сепкіш, 188,5 мың топырақ өңдейтін құрал-сайман және техникалық қолдау көрсететін 70 сервис орталығы бар.
Бұған дейін хабарланғандай, Қазақстан әлемнің жетекші ауыл шаруашылығы техникасын өндірушілерімен Қостанай қаласында өндірісті оқшаулау туралы келісімдерге қол қойған болатын. Атап айтқанда, Vaderstad Group, Dewulf, Lindsay Corporation, Amity Technology, Frans Vervaet B.V., Kuhn Group және Brandt сияқты ірі компаниялармен ынтымақтастық орнатылды.
Сондай-ақ өткен жылдың қараша айында «АгромашХолдинг KZ» АҚ мен америкалық John Deere компаниясы құны 2,5 млрд доллар болатын стратегиялық серіктестік туралы келісімге қол қойды. Құжатқа сәйкес, алдағы бес жылда «АгромашХолдинг KZ» АҚ базасында кемінде 3 мың бірлік John Deere техникасын шығару жоспарлануда.
